![[Passamynd]](/files/2003/05/mar.gif)
Már ÖrlygssonÍslenskt leitarvélaspam?
Ég hef undanfarið verið að skoða stöðuna á íslenska markaðnum fyrir leitarvélabestun, og rakst í því samanbandi á nokkuð sem mér þótti bæði athygli- og umhugsunarvert.
Íslenskt fyrirtæki sem heitir Libius selur m.a. leitarvélabestun, og virðist beita við hana ansi sérstæðum aðferðum.
Ef maður t.d. Googlar "Dagur Jónsson" "CEO of Libius Inc" þá finnst mikið magn greina sem flestar virðast hýstar hjá vefsvæðum á borð við EzineArticles.com og GoArticles.com sem sérhæfa sig í "dreifingu greina" sem agn fyrir leitarvélar. EzineArticles.com er t.d. á spam bannlista Wikipedia.
Jafnframt þessu virðist Dagur Jónsson (eða Libius) halda úti tilbúnum bloggsíðum fyrir viðskiptavini sína - síðum á borð við...
- 66north-iceland.blogspot.com
- kaupthing.blogspot.com
- openhandmobile.blogspot.com
- marelfoodsystems.blogspot.com
- o.fl.
...en þessar síður innihalda ýmist endurnýttar fréttatilkynningar eða þvaðurkenndar færslur sem enda allar á vísun til baka á heimasíðu viðkomandi fyrirtækis. Þetta eru (sýnist mér) jafnan sömu textarnir og birtast á EzineArticles.com og fjölda annara tengdra vefsvæða.
Þetta er það sem ég fann í fljótu bragði með einfaldri leit, en mögulega leynist sitthvað fleira þarna úti sem Libius kýs að merkja sér ekki með jafn áberandi hætti.
Það kom mér kannski ekki beinlínis á óvart að íslenskt fyrirtæki beitti svona vafasömum aðferðum við að pumpa viðskiptavini sína upp í leitarvélunum, en samt hafði ég vonað í laumi að svo væri ekki, og að íslensk fyrirtæki væru yfir það hafin -- ef ekki að veita svona gerviþjónstu, þá að minnsta kosti yfir það hafin að kaupa hana.
Ég velti t.d. fyrir mér hvers vegna fyrirtæki á borð við Kaupþing telur sig þurfa þessi meðul til að auka sýnileika sinn í Google. Varla byggja stór fjármálafyrirtæki stóran hluta veltu sinnar á fólki sem slysast inn á heimasíðuna þeirra eftir handahófskennda leit í Google.
Svör frá lesendum (19)
Þórarinn Leifsson svarar:
Leitarvélabestun? Kæri vinur, þvílíkt orðskrípi.
11. október 2007 kl. 08:43 GMT | #
Már svarar:
Leitarvélabestun, kæri vinur, er tiltölulega viðtekið íðorð fyrir þetta fyrirbæri, með rætur í íslenskri málhefð raungreina (sjá t.d. hér).
Knappt, þjált og lýsandi.
11. október 2007 kl. 09:39 GMT | #
Guðmundur D. Haraldsson svarar:
Og af þessu hefur fólk atvinnu...
11. október 2007 kl. 23:15 GMT | #
Dagur Jónsson svarar:
Kæri Már
Ég hef lesið þessar alvarlegu ásakanir sem þú kemur hér með og vil koma með eftirfarandi svör við þeim. Þetta er náttúrlega atvinnurógur af verstu gerð sem eiga sér enga stoð í raunveruleikanum. Þú hefur aldrei haft samband við mig og hefur aldrei rætt þessi mál við mig og því kemur þessar ásakanir þínar mér í opna skjöldu og ég hlýt að túlka að þær byggist á einhverju persónulegu gagnvart mér. Ég er algjörlega ósammála þér í öllum atriðum þar sem það er í raun engin ein rétt leið og koma mönnum áfram á leitarvélum. Google hefur t.a.m. aldrei gefið það upp hvað þeir raunverulega vilja að menn geri en flestir tala um að gott sé að komast á bogg síður og greinasöfn og því sé ég í raun ekkert athugahvert að halda uppi blogg síðum með hvaða efni sem er og að maður skrifi greinar og birti undir sínu nafni sem ég er jú að gera með link á áhugaverðan vef til að lesa efni sem er tengd greininni. Hvað menn segja um EzineArticles.com þá er sú síða með PR 6 og Google t.am. tekur aftrit af síðunni daglega svo ekki lítur Google á hana sem slæma síðu. Wikipedia er grunnur sem haldin er uppi af fólki og því getur verið að einhver með mikil áhrif þar hafi sett síðuna á bannlista og ég hef ekki sett mig inn í það mál.
Ég er ekki að gera neitt sem aðrir í þessu eru ekki að gera líka. Ég hef alls ekki farið offari í neinu og t.a.m. koma þrjár greinar á mánuði með efni sem er tengt þeim fyrirtækjum sem ég er að vinna fyrir auk þess er ég ekkert að spama eitt né neitt og engin af þeim síðum sem ég hef verið að vinna fyrir hafa fengið aðvörum frá nokkurri leitarvél.
Þetta er túlkun þín á alls ekki rétt á sér, hvað hefur þú fyrir sér að þetta sé eitthvað vafasamt, hvar er lýsing á því sem er vafasmt og hvað hefur þú fyrir sér að þetta sé að skila einhverjum argrúa af heimsóknum sem það er reyndar ekki að gera. Afhverju t.a.m. má ekki birta fréttir frá fyrirtækjum á sem flestum stöðum, þá athugasemd skil ég engan veginn.
ég sé ekkert athugavert við þessa þjónustu mína þar sem þetta er alls ekki spam og ég hef alls ekki farið offari í þessum málu. Þetta eru alvarlegar áskanir sem þú kemur með og á sjálfsagt eftir að vera mér erfiðar og þetta er hið alvarlegasta mál þar sem þær eiga ekki stoð í raunveruleikanum.
kær kveðja Dagur Jónsson
13. október 2007 kl. 18:37 GMT | #
Dagur Jónsson svarar:
New Website? It's Time To Think Links
[Rúmlega 1500 orða copy-paste er aðeins of mikið af því góða. Set inn link í staðinn -- Már]13. október 2007 kl. 23:29 GMT | #
Már svarar:
Dagur!
Ég bið þig afsökunar á einni setningu í færslunni minni hér að ofan, og ég er búinn að stirka yfir hana og marka sem dylgjur.
Að öðru leiti stendur það sem ég skrifaði sem hlutlaus og upphrópanalaus lýsing á því sem blasir við. Mér finnst þetta "athygli- og umhugsunarvert", "ansi sérstætt" og siðferðislega "vafasamt". Ekkert persónulegt þar á ferðinni.
Þjónustan sem þú selur er margþætt, og svona próaktíf tenglasmíði (sem ég kalla "vafasama"), er væntanlega aðeins einn lítill hluti af henni. Ef þú ert jafn viss um ágæti þessara aðferða, þá tekurðu vart nærri þér að ég dragi þær fram í dagsljósið og viðri mína skoðun á þeim.
...
Umræðan um siðferði í leitarvélabestun hefur staðið yfir í mörg ár í Evrópu og Ameríku, en vegna smæðar og vanþroska íslenska vefmarkaðarins, þá hefur þetta ekki komist inn á radarinn hjá vefstjórum og stjórnendum fyrirtækja hér á Íslandi.
Það sem fyrir mér vakir er að vekja upp umræðu um þessi mál. Þetta er umræða sem mér finnst verða að fara að eiga sér stað.
Þetta er samt í raun og veru lítið annað en endurtekning á gömlu umræðunni um ruslpóst vs. eðlilega markaðssetningu með tölvupósti. Líkt og þessi, þá fór sú umræða seint í gang hér á landi.
...
Þú segir:
Ef flest eða öll Íslensku bestunarfyrirtækin gera þetta líka, þá finnst mér það mjög áhugavert innlegg í þessa umræðu. Getur þú bent á einhver bent á dæmi um það?
Mér finnst þarna gæta ákveðins misskilnings hjá þér; eins og þú teljir eðlilegt að a) hafa bein (aktíf!) áhrif á stöðu ákveðinna vefsvæða í leitarvélum, og b) að Google geri vefsíðum kleyft að beint eða óbeint velja sér stöðu í leitarniðurstöðunum.
Google (og flestar viðlíka leitarvélar) álíta það hlutverk sitt að leggja hlutlaust og sanngjarnt mat á hvaða vefsíður munu gagnast leitarnotendum best - ekki að þjóna hagsmunum þeirra sem búa til vefsíðurnar.
Allar tilraunir til að bæta stöðu vefsvæðis í leitarvélum (umfram það að bæta gæði innihalds/framsetningar vefsvæðisins sjálfs og reiða sig á sjálfsprottinn áhuga (linka) neytenda/vefgesta) eru í eðli sínu á gráu svæði siðferðislega. Sumt er alveg "fallegt og eðlilegt" en annað lendir klárlega á dekkri enda siðferðisrófsins þar sem það gengur þvert á tilraun leitarvélarinnar til að leggja sjálfstætt mat á gæði þess efnis sem það réttir leitarnotendum.
...
Af því það er svo skemmtilega kaldhæðnislegt, þá er hér grein á EzineArticles sem skýrir muninn á hugtökunum Black Hat, White Hat and Gray Hat SEO.
Að mínu mati flokkast svona tilvísanasmíði sem þú hefur stundað, klárlega undir "grey hat" aðferðir.
Ég tek ekki sterkari afstöðu til hennar en að mér finnst hún siðferðislega "vafasöm", og ég efast um að það sé þörf á þessum meðulum og að þetta gagnist iðskiptavinum þinum á neinn hátt sem skiptir þá raunverulega máli.
14. október 2007 kl. 22:52 GMT | #
Dagur Jónsson svarar:
Sæl Már
Ég vil ítreka það að ég sé ekkert athugavert við það að dreifa kynningarefni og fréttum af fyrirtækjum sem víðast og tel það vera mjög hentuga og eðlilega leið í því að koma fyrirtækjum á framfæri. Þetta er orðinn víðtæk venja út um allan heim og ef þú tekur ekki þátt í þessu að þá verður þú einfaldlega undir í samkeppninni. Hvernig á maður t.d. að koma nýju fyrirtæki á framfæri nema að koma sem mestu efni um það fyrirtæki á framfæri.
Ef leitarvélar eins og Google væru á móti þessari aðferð þ.e.a.s. að birta/skrifa greinar og halda uppi bloggsvæðum að þá væri Google einfaldlega búið að “ignora” þessi vefsvæði. Það hefur hún svo sannalega ekki gert og er greinilega að taka reglulega afrit af þessum síðum sem sýnir góðan stuðning við það sem Libius er t.d. að gera.
Ég skil ekki þessar pælingar þínar um siðferði og hlutleysi, er það siðlaust að skrifa greinar um fyrirtæki og birta fréttir af þeim á bloggsvæðum? og ef svo er hvað er siðlaust við það er þetta ekki það sem fyrirtæki vilja þ.e.a.s fá sem mesta umfjöllun? Og hvað er hlutleysi? Ef Google er á móti þessu og telur þetta vera anstætt hlutleysis markmiðunum sínum að þá lætur hún crawlerinn sinn einfaldlega sleppa því að lesa þessar síður. Það er hún svo sannalega ekki að gera.
Ég er ekki alls ekki að mata leitarvélarnar af óheiðarlegum eða villandi upplýsingum og er því alls ekki á gráu svæði. Ég setti inn grein um daginn sem er á slóðinni http://www.sitepronews.com/archives/2007/oct/3.html þar sem einmitt er talað um að þær aðferðir sem Libius notast t.d. við í sinni markaðssetningu séu akkúrat þær bestu sem hægt er að framkvæma og algjörlega ásættanleg vinnubrögð.
Þú mátt ekki gleyma því að það er hörð samkeppni að koma fyrirtækjum á framfæri á leitarvélum og það er sjálfsagt mál að beita öllum aðferðum sem hægt er að beita án þess að villa fyrir fólki eða ganga of langt. Libius hefur ávallt haft það að leiðarljósi að vera heiðarlegt í sinni markaðsvinnu og villa alls ekki fyrir fólki eða fara offari.
Ef menn/fyrirtæki gera ekki neitt eins og þú ert reyndar að leggja til að fyrirtæki eigi að gera og þau eigi að treysta á innsæi leitarvéla í því að “ranka” viðkomandi fyrirtæki ofarlega. Og að þau eigi einnig að treysta á góðmennsku fólks að linka yfir á þau að þá ertu dæmdur til að ná engum sýnileika eða í besta falli mjög takmörkuðum. Þau fyrirtæki sem voru á undan þér að koma sér upp góðu vefsvæði og eru stærri (markaðslega og fjárhagslega) en þú, munu einfadlega vinna í samkeppninni um stöðu á leitarvélum og sýnileiki á leitarvélum snýst jú um samkeppni við næsta mann/fyrirtæki.
Virðingafyllst Dagur Jónsson Libius ehf.
15. október 2007 kl. 13:27 GMT | #
egill svarar:
Afskaplega finnst mér þetta vera veik rök hjá honum Degi. Allir hinir strákarnir í bekknum eru að gera þetta, þá má ég gera þetta líka.
Það sem þú ert að segja Dagur er það að það sé réttlætanlegt að nota loðna aðferðarfræði til þess að koma fyrirtækjum á framfæri. Við eigum ekki að treysta leitarvélunum, heldur eigum við að treysta fólki eins og þér til að koma upplýsingum ofar í leitarvélar.
Ég á mjög erfitt með að skilja hvernig þessi rök þín ganga upp. Minnir mig örlítið á rök sem gerendur eineltis hafa notað. "Hann kvartaði ekkert, hann þagði bara, ég hlýt þessvegna að mega þetta?"
Sem netverja þá þykir mér Kaupþing t.d. hafa tekið ranga beygju með því að kaupa þessa þjónustu, sem og aðrir. Ég sé annars alveg fyrir mér að Bill Gates sitji við tölvuna sína að leita að nýjum banka til að leggja inn milljarðana sína :D
Í mínum huga er þetta alveg jafn rangt og að kasta snjóbolta í bíl...
16. október 2007 kl. 08:35 GMT | #
Kristján Örn Elíasson svarar:
Már hefur þessa umræðu á því að segja að undanfarið hafi hann verið að skoða stöðuna á íslenska markaðnum fyrir leitarvélabestun (SEO). Við skulum því halda okkur við íslenska markaðinn.
Að mínu mati hafa yfir 95% íslenskra vefsíðna ekki fengið neina "leitarvélabestunarmeðferð". Í u.þ.b. 4% vefsíðna hefur kannski verið ritað í "title", "content" og "keywords" og punktur! Afgangurinn, þetta eina prósent, er kannski aðeins sýnilegri sökum vandaðri vinnubragða.
Síðan hans Dags, www.libius.is, er í 4% hópnum. Góðu fréttirnar eru því að hann er í topp 5%. Slæmu fréttirnar eru hins vegar þær að hann er þar vegna þess að 95% íslenskra vefsíðna eru ekki að gera neitt!
Hvað segir þetta okkur um íslenska markaðinn?
Það er mjög auðvelt að skora hátt í leitarvélum sem leita á íslenskum vefsíðum. Við erum svo "heppin" að vera fámenn og tala íslensku (lítil samkeppni um hvorutveggja). Um 90%-95% leitarvélanotenda á Íslandi nota Google og Leit.is. Það þarf því ekki að hafa áhyggjur af öðrum leitarvélum.
Hvað Google varðar þá skráir (indexar) hún mjög ört, jafnvel daglega vinsælar síður, og leggur mest áherslu á ofangreint, gæði tengla sem vísa á viðkomandi vefsíðu (meðmælatengla) og allt það sem Már nefndi hér að ofan í þessu sambandi. Leit.is starfar á álíka forsendum og indexar á 7 til 10 daga fresti.
Íslensk fyrirtæki sem vilja vera sýnileg á netinu með vörur sínar og þjónustu þurfa í raun ekki að leggja svo mikla vinnu í leitarvélabestun (SEO) sökum samkeppnisleysis. Þau þurfa að gæta þess að skilgreina sig ekki of vítt (aðgreining) og nota "réttu" orðin á "réttum" síðum á "réttan" hátt.
Dæmi: Síðan hans Dags, www.libius.is hefur verið sett upp með völdum orðum og setningum í "title", "keywords" og "content". Í undirsíðum www.libius.is eru hins vegar ofangreind metatög auð og gefa því leitarvélum engar eða litlar vísbendingar um hvaða efni er að finna á þeim. Ef þær ranka hátt í leitarvélum þá er það aðeins vegna skorts á samkeppni. Ef Dagur setti t.d. leitarorðið "internetráðgjöf" í keywords metatögin á undirsíðunni "Internetráðgjöf" og orðin kæmu einnig fyrir á viðkomandi síðu þá yrði það mun áhrifaríkara en að fá t.d. tengil frá ómarkvissu bloggi (liðin tíð).
Ég mæli hiklaust með fljótlegri, árangursríkri og ódýrri leið meðfram vinnu í leitarvélabestun (SEO) en það er SEM (Search Engine Marketing). Hjá Google er hægt að kaupa AdWords þar sem aðeins er borgað fyrir smelli (PPC) eða heimsóknir en ekki birtingar. Þar sem samkeppnin er ekki mikil hér á landi ætti viðkomandi auglýsing/vefsíða að koma upp efst/ofarlega hægra megin við leitarniðurstöðurnar - mjög sýnileg/árangursríkt. Á Leit.is er hægt að kaupa mjög öfluga skráningu á 20 leitarorðum, auglýsingaborða (800x100 pixl) sem eltir 5 leitarorð, skráningu á þjónustusíður (tenglasíður) o.fl. fyrir aðeins kr.39.200 árið.
Eins og staðan er í dag þá koma þessi leitarorð fyrir ofan náttúrulegar leitarniðurstöður (blönduð leitarvél) en hjá Google eru leitarniðurstöðurnar hreinar (SEO).
Af því ég var að tala um síðuna hans Dags hér að ofan þá get ég glatt hann með því að hann hefur óskipta athygli með leitarorðið "leitarvélagreining" í Leit.is. Skýringin er að vísu sú að það er engin samkeppni um orðið (tvær niðurstöður á Google).
Annað: Nú eru margir sem kaupa sér lén sem enda á .com og .net og kaupa jafnvel hýsingar erlendis. Google lítur á com lénin sem erlendar vefsíður á erlendum tungumálum og ennfrekar ef hýsingin er einnig erlendis. Þetta er "default" stilling hjá Google en hún lærir með tímanum og kemst að hinu sanna að lokum. Skilaboðin: notið .is og íslenska hýsingu hér heima en t.d. .com og erlenda hýsingu ef vefsíðan er ætluð til brúks erlendis (fer eftir landi).
Leit.is indexar aðeins íslensk lén (.is) því er nauðsynlegt fyrir þá sem nota .com og.net, og eru með íslenskar vefsíður, að fara fram á að viðkomandi síður séu indexaðar. Síður sem hafa enga "inbound linka" finnast oft heldur ekki ef þær hafa ekki verið skráðar sérstaklega.
Bestu kveðjur, Kristján Örn Elíasson
Markaðs- og verkefnastjóri hjá Leit.is
18. október 2007 kl. 05:51 GMT | #
Már svarar:
Sæll Kristján.
Uhm.. síðast þegar ég gáði voru mörg ár síðan Google og aðrar stórar leitarvélar hættu að taka nokkurt mark á
<meta name="keywords" />leitarorðum í vefsíðum.Ástæðan var sú að
<meta />leitarorðin eru ósýnileg venjulegum notendum, en að sama skapi misnotuð svo svakalega af leitarvélaspömmurum. Almenna stefnan hjá leitarvélunum virðist vera sú að taka fyrst og fremst mark á "sýnilegum" upplýsingum.Mig grunar að Dagur viti þetta, og sitthvað fleira, um hvernig stóru leitarvélarnar virka.
Merkileg tilviljun að þetta er einmitt sama verð og ég rukka og fyrir birtingu á beinum auglýsingum í svarhölum á bloggsíðunni minni.
Ég sendi þér reikninginn eftir helgi.
Ég hef ekki orðið var við annað, en að Google sé með tiltölulega öfluga gisk-aðferð til að ákvarða tungumál vefsíðna. Sér í lagi grunar mig að þeir noti sem vísbendingu
lang=""stillinguna ef hún er til staðar í HTML kóðanum - ég hef þó ekki sannreynt þá kenningu.Það eru ýmsar flökkusögur í gangi í bransanum um hvort/hvernig staðsetning hýsingar, og léna-endingar hafi áhrif á sýnileika í Google (hvort sem er staðbundinn, eða almennan), en þegar maður grefur dýpra kemur oftar en ekki í ljós að þær byggjast kannski á einni og sömu frumheimildinni sem var kannski ekki nema sögusögn.
Af gefinni reynslu, tek ég því öllum svona fullyrðingum (jafnvel frá sérfræðingum í faginu!) með miklum fyrirvara - þar til traust, og óvéfengjanleg heimild liggur fyrir.
Með tiltölulega einfaldri leit í Google getið þið ábyggilega fundið flestar íslensku vefsíðurnar sem eru að nota lén sem enda á .com, .net, .org, o.þ.h.
Bara svona tillaga. :-)
18. október 2007 kl. 13:03 GMT | #
Dagur Jónsson svarar:
Sæll Kristján
Ég vildi benda þér á að ég hef ekkert verið að gera neina sérstaka SEO / SEM vinnu fyrir vef Libius (www.libius.is) þar sem ég hef ekki talið okkur þurfa þess sérstaklega m.a. sökum þess að markaðurinn er smár hér á landi eins og þú bendir réttilega á og við erum nú þegar með mjög fínan sýnileika fyrir þau orð sem við viljum finnast undir. Enda er nóg að gera í öðrum verkefnum og ég hef einfaldlega ekki haft tíma til að sinna vef Libius nægilega vel undanfarið en það mætti hugsanlega taka smá skúrk í honum og laga meta tögin á undirsíðunum sem hefur einfaldlega ekki verið klárað vegna anna. Þetta er reyndar það fyrsta sem við förum í þegar við framkvæmum leitarvélarbestun en ég sé reyndar ekki betur en Google t.d. sé hætt að lesa meta skipanirnar. Hún hefur ekki lesið keywords í einhver ár en ég sé ekki betur en hún sé einnig hætt að lesa description þótt ég þori ekki að segja það með 100% vissu en ég er svona 95% viss. Skoðið bara leitarniðurstöðurnar og þá sjáið þið þetta. Þetta þýðir að content er það sem rúlar.
Kristján ef þú lest það sem fram hefur farið á milli mín og Márs að þá sérðu að Már er alls ekki að taka vefinn minn sérstaklega fyrir heldur er hann að kommenta á það sem Libius er almennt að gera fyrir viðskiptavini sína sem hann telur vera á mörkum þess að vera á gráu svæði, sem ég er aftur á móti algjörlega ósammála. Okkar rökræður ná ekki til keyptrar leitar eða hvort við fyllum út meta keywords eða meta description. Ég vil fá að benda þér á að Libius vinnur aðallega fyrir fyrirtæki sem starfa á erlendum mörkuðum á einhverju eða miklu leiti og er í dag með um 50 viðaskiptavini á sínum snærum. Fyrir þessi fyrirtæki framkvæmi Libius umtalsverða leitarvélarbestun fyrir vefsvæði viðkomandi fyrirtækis sem síðan er fylgt eftir með reglulegri SEM vinnu sem Már er m.a. að rökræða við mig um hvort sé á gráu svæði eða ekki.
Skoðaðu listann yfir viðskiptavini mína og þá sérðu þá vinnu sem ég hef verið að vinna fyrir þá aðila.
Vinna Libius felur í grófum dráttum í sér eftirfarandi:
Fyrst framkvæmir Libius leitavélarbestun fyrir vefsvæðið sem felur m.a. í sér:
Mánaðarlega tekur Libius svo eftirfarandi að sér til að viðhalda og eða auka sýnileikann:
Einu sinni á mánuði skilar Libius af sér greinargerð sem tekur m.a. fyrir:
Öll vinna Libius er unnin í góðu samráði við vefstjóra eða aðra forsvarsmenn þeirra fyrirtækja við vinnum fyrir. Við gerum ekki neitt nema með vilja og/eða samþykki þeirra sem við vinnum fyrir.
Persónulega er ég búinn að tengjast internetinu á einn eða annan hátt síðan 1996 og tel mig hafa mjög góða yfirsýn yfir málaflokkinn svo þú Kristján ert ekki að segja mér neitt nýtt. Og lít ég á innlegg þitt fyrst og fremst sem ódýra auglýsingu fyrir þitt góða fyrirtæki Leit.is.
kv, Dagur Jónsson
19. október 2007 kl. 01:41 GMT | #
Már svarar:
...öhm... og nú eruð þið orðnir tveir. Hvað eru annars tvisvar sinnum 39.200 kr.? Fer ég ekki að verða ríkur bráðum?
Annars mun allt þetta tal um "Libius" líklega valda því að þessi bloggfærsla mun birtast sem ein af topp fimm niðurstöðum í Google þegar fólk leitar að því orði.
*Dæs*.
20. október 2007 kl. 01:21 GMT | #
Borgar svarar:
Þetta eru furðulegar umræður og merkilegar fyrir ýmsar sakir. Mér finnst sérstaklega athyglisvert að þið leitarvélasérfræðingar skulið báðir einblína á þá þjónustu sem þið veitið, en hvorugur ykkar virðist hafa skilning á, eða vilja til þess að takast á við, það sem raunverulega er lagt upp með í þessari færslu Más.
Málið snýst ekkert um það hvað þið kappar rukkið fyrir tímann. Heldur þá þróun að íslensk fyrirtæki séu nú farinn að veita peningum í spamdexing, sem er akkúrat það sem Már hefur hér staðið Dag að því að stunda.
Frá mínum bæjardyrum séð er þetta mjög einfalt. Libius stundar spamdexing. Spamdexing er siðlaust athæfi. Það er ekkert á gráu svæði. Þetta er bein árás á flokkunarkerfi Google.
Ástæðan fyrir því að ég er ekki tilbúinn til þess að horfa á þetta sem neitt annað en siðlaust er sú að þessar árásir sitja oftar en ekki ofan á stóru neti hakkaðra véla, og tengjast vírusframleiðslu og öðrum skipulögðum tölvuglæpum. Að veita peningum inn í þennan bransa er ekki bara algjörlega siðferðislega rangt, heldur einnig gríðarlega heimskulegt.
Þeim sem láta sér detta það í hug að einhverjar heiðursreglur gildi á þessu svæði vil ég benda á að skoða bloggsíðu Ármanns Jakobssonar, eða öllu heldur rústir hennar. Síðan hefur verið tekin yfir einfaldlega til þess að stela pageranki hennar. Ágætis bloggsíða sem búið er að hakka og breyta í rusl.
Ég er vel tilbúinn til þess að trúa því að allt annað af þeirri þjónustu sem Libius veitir sé vænleg til þess að bæta sýnileika vefsíða gagnvart leitarvélum. Það er bara þetta eina atriði sem er vandamálið. Ég skal ekki segja hvort þau net sem Libius notar eru vírusa-/zombievéla net, en þetta ER spamdexing og er, í mínum huga, þar með í sama flokki.
Það er ekkert gríðarlega dýrt að kaupa auglýsingar af Google, og ég hef persónulega orðið vitni af því að skráning á Leit.is skilaði stóraukinni umferð í síðu í minni umsjá. Að ætla að ráðast á flokkunarkerfi leitarvéla til þess að brengla niðurstöðurnar sér í hag er ekkert frábrugðið tryggingasvindli eða skattsvikum, það er óheiðarlegt og það kemur niður á öllum öðrum í samfélaginu.
20. október 2007 kl. 14:12 GMT | #
Dagur Jónsson svarar:
Ágæti Borgar
Þú ert nú ansi yfirlýsingaglaður og fullyrðir hluti sem eiga sér enga stoð í raunveruleikanum. Við höfum ekki notað neinar vélar eða tæki til að koma viðskiptavinum okkar á framfæri heldur setjum við allt efni handvirkt á þá staði sem við teljum að hjálpi viðskiptavinum okkar að koma sér á framfæri.
Ef Google væri svona hræðilega illa við vinnubrögð okkar og fjölda annar SEM fyrirtækja að þá myndi hún einfaldlega ignora þær síður sem við notumst við og banna þær aðferðir sem við notum. Ég vil segja það hátt og skýrt að það hefur hún ekki gert og sýnileiki viðskiptavina Libius er almennt mjög góður.
Ég er orðinn nokkuð þreyttur á öllum þeim fullyrðingum og staðhæfingum sem þú og Már hafa að segja um fyrirtækið mitt og þá sem ég er að vinna með og fyrir. Sérstaklega þar sem þið hafið ekki haft þor að tala við mig persónulega um þessi mál og kynna ykkur það sem Libius hefur fram að færa. Libius er ekki að finna upp hjólið í þessu og erum við einfaldlega að nýta okkur þær aðferðir sem nýtast bet í því að koma fyrirtækjum á framfæri, sem þau að sjálfsögðu vilja og eru til í að greiða fyrir, þessi vinna er gerð í góðu samráði við þau. Allt tal um að við stöndum að beinni árás á flokkunarkerfi Google er út í hött þar sem við beitum viðurkenndum aðferðum sem Google hefur ekkert gefið út um að þeir séu á móti.
Ég verð að benda á að Google er með spider crawlers sem indexa síður á netinu en ekki handvirkan grunn eins og t.d. Yahoo notast að stóru leiti við. Ef Google væri á móti þessu öllu saman myndi grawlerinn hjá þeim sleppa því að lesa þær síður sem að þeirra mati beitti siðferðislega röngum aðferðum. Ef Yahoo væri einnig á móti þessu myndi fólkið sem vinnur hjá þeim að skoða síður á vefnum einnig banna þessar síður auk þessi sem þeir grunnar sem hún tengist við myndum einnig banna þessar síður. Þetta er ekki að gerast og minni ég á að Google hefur t.a.m aldrei gefið það upp hvað hún vill að menn geri til að ná góðum sýnileika. Almennt má þó gefa sér að menn eigi að hafa gott efni á vefnum sínum, fá sem flesta til að linka á vefinn, senda reglulega frá sér fréttir og kynningarefni og birta sem víðast. Afhverju eru t.d. svona mikið af fréttaveitum, greinavæðum og öðrum social vefum ef þetta væri allt siðferðislega rangar síður. Og afhverju væri Google með sérstaka fréttaveitu og bloggveitu ef hún væri á móti því efni sem birtist á þeim stöðum. Sannleikur er sá að hún er alls ekki á móti því að menn/fyrirtæki birti efni sem víðast.
Allt sem þú og Már haldið fram er í bara ykkar túlkun og sumra af vinum ykkar á Wikipedia sem er að mínu mati grunnur haldinn af púrítönum sem telja sig hafa sérstaklega rétt fyrir sér. Það að gera ekki neitt nema að setja upp góðan vef er dæmt til að gefa af sér mjög takmarkaðan sýnileika. Það er orðinn hörku samkeppni í að birtast ofarlega á Google og menn geta ekki setið hjá aðgerðalausir. Ég skil ekki viðbrögð þín við aðferðum Libius að koma fyrirtækjum á framfæri og líkja því við tryggingasvindli eða skattsvikum er nú ansi mögnuð yfirlýsing hjá þér þar sem þú veist ekkert betur en ég hvað má og hvað má ekki gera þegar kemur að því að koma sér ofar í flokkunaröð Google.
Virðingafyllst Dagur Jónsson
20. október 2007 kl. 15:30 GMT | #
Már svarar:
Dagur.
Þori ekki að tala við þig? Bíddu, hvað erum við að gera annað en að tala saman? Ekki nóg með að ég þori að tala við þig, heldur þori ég að gera það á opinni bloggsíðu. (Auk þess sem við töluðum saman í síma um daginn.)
Annað: Ég er ekki Borgar, og þótt bæði hann og Egill hafi tiltölulega sterkar skoðanir á þessu máli, þá er það ekki sjálfkrafa mínar skoðanir.
Ennfremur, hef ég ekkert sagt um fyrirtækið þitt, og enn síður neitt um viðskiptavini þína. Ég dró hins vegar fram í dagsljósið einn afmarkaðan þátt í þjónustunni sem fyrirtækið þitt veitir, sem mér þykir þú útfæra á siðferðislega vafasaman hátt.
Líkt og ég vonaði, þá hafa samræðurnar hér í svarhalanum hafa svo varpað auknu ljósi á ólíkar hliðar málsins.
Ok, hér þykir mér þú farinn að hljóma eilítið eins og Hannes Hólmsteinn um gróðurhúsaáhrifin. "Spamdexing er ekki til og umræðan um það er bara hnattrænt samsæri afturhaldskommatitta sem hata framfarir og éta litla sæta kettlinga." Þettta hljómar næstum því svona hjá þér. Ekki alveg en næstum því. ;-)
Málið er að þessi umræða er margra ára gömul (þótt hún sé tiltölulega óþekkt hér á landi) og hún var ekki fundin upp á Wikipedia. Það vill bara svo til að á Wikipedia eru ágætar samantektir á helstu hugtökunum, sem er auðvelt að vísa á.
N.B. Ég er persónulega alveg 100% sáttur við að þér skuli finnast þú vera að þræða hinn þrönga veg. Ég hef enga hvöt til að þræta við þig um það. Bæði sjónarmiðin hafa komist á framfæri, og eins og í öllum hreinræktuðum siðferðismálum, þarf bara hver og einn að komast að sinni eigin niðurstöðu.
20. október 2007 kl. 23:50 GMT | #
Borgar svarar:
Dagur,
Fyrst þér finnst Wikipedia ekki merkilegur pappír að vísa í, þá tekur þú kannski mark á ítrekuðum yfirlýsingum og skýrum leiðbeiningum Google? Hér eru nokkrir linkar:
Webmaster Guidelines:
Googlebombing 'failure'
Google's 'death penalty' for BMW
Ég vil að það komu skýrt fram að ég hef ekkert að athuga við SEO sem iðn. Ég geri mér einnig fullkomlega grein fyrir því að linkar inná síðu eru nauðsynlegir til þess að lyfta henni upp í niðurstöðum Google og SEO fyrirtæki þurfa að hjálpa til við það líkt og aðra þætti málsins.
Það er hinsvegar munur á því að virkja aðra vefi til þess að linka til baka (með t.d. beitu á viðfangssíðu eða inn-linkahvetjandi markaðsherferð) og því að dreifa endurteknu efni og setja upp sokkabrúðublogg í þeim tilgangi. Sem sagt: Að hvetja fólk til þess að linka á sig = rétt, að búa til gervifólk og linka með því = rangt.
Ég vil endurtaka það sem ég sagði áður, að ég er ekki að efast um að þjónustan þín skili árangri og að þú vinnir góða vinnu. Það er bara þetta eina atriði í öllum pakkanum sem ég, persónulega, hef eitthvað við að athuga og vil biðja þig, sem kollegi þinn í vefbransanum, um að endurskoða - eða í það minnsta hugsa vel um. Ekki af því að ég vilji vera leiðinlegur, heldur vegna þess að ég vil þér, og fyrirtæki þínu, vel.
21. október 2007 kl. 12:54 GMT | #
Már svarar:
Ég hef ekki orðið var við að Dagur "búi til gervifólk" eða reyni aktíft að hylja það að hann sé ábyrgur fyrir umræddum textum og linkum.
Atriði eins og "substantially duplicate content", o.fl., má hins vegar að einhverju leyti heimfæra á það.
21. október 2007 kl. 14:24 GMT | #
Borgar svarar:
Nei, ég er heldur ekki að saka hann um það, enda hef ég ekkert fyrir mér í því. Heldur er ég þarna að reyna að undirstrika, eða einfalda, muninn á þeim aðferðum sem notaðar eru. Kannski aðeins of mikið. :-)
21. október 2007 kl. 14:55 GMT | #
Dagur Jónsson svarar:
Eftir umræðurnar undanfarna daga hef ég skoðað vel og vandlega þær aðferðir sem ég hef verið að beita og hef komist að því að í lang flestum tilvikum tel ég mig hafa notast við réttar og viðurkenndar aðferðir.
Ég sé þó að blogsíðurnar sem ég hef sett upp geta orkað tvímælis og hef ég því tekið út það efni sem eru á þeim síðum og hef sett í staðinn stuttan texta um viðkomandi fyrirtæki. Það geri ég eingöngu til að tryggja það að enginn annar eigni sér viðkomandi blogg og geti sett inn hvaða texta sem er. Ég mun hér með ekki nota þessi svæði til að “promota” viðkomandi fyrirtæki enn frekar.
Hvað varðar greinarskrif að þá eru þau sérstaklega skrifuð að fólki tengdu mér og eru ekki duplicate texti af síðum þeirra fyrirtækja sem ég hef verið að vinna fyrir. Ég hef dreift greinunum em ég er stílaður fyrir á takmarkaða staði og er ég t.a.m. eingöngu með 418 linka á mig sem greinaskrifara, sem ég tel alls ekki vera spam. Töluvert er að aðrir dreifi og/eða bloggi um greinar og fréttir sem birtast um fyrirtækin og ég get ekki verið persónulega ábyrgður fyrir slíku. Ég mun þó takmarka mína dreifingu á greinum og eingöngu birta það sem ég og mínir umbjóðendur telja að sé “relevant” fyrir viðkomandi aðila/fyrirtæki.
Ég vil gjarnan stuðla að ákveðnum sáttum í þessu máli og hef ég alls engan hag í því að stuða fólk, það er ekki til frama til langs tíma. Ég vona því að við getum lokið þessari umræðu og tekið hana í staðinn á öðrum vettvangi.
Virðingafyllst, Dagur Jónsson
21. október 2007 kl. 15:33 GMT | #