Færslur laugardaginn 28. apríl 2007

Kl. 02:12: Vilhjálmur borgarstjóri og Njálsgöturónarnir á leikskólanum Barónsborg 

Ég veit ekki alveg hvað mér á að finnast um þetta mál:

• Útigangsmenn á Njálsgötu 74
• Af hverju endilega hjá okkur?
• Íbúar á Njálsgötunni fagni nýjum grönnum
• Mótmælendur gengu í hús á Njálsgötunni

Mér þykja það ótrúleg ómerkilegheit þegar fólk leggst gegn svona velferðarþjónustu á þeim forsendum að fasteignirnar þeirra lækki í verði. (Íslenskir smáborgarar berjast oft hatrammlega gegn sambýlum fatlaðra og þroskaheftra með sömu rökum.)

Einhversstaðar þurfa "vondir" að vera, og hví ekki í nágrenni við "gott" fólk?

Hins vegar þykir mér það afskaplega óheppileg stjórnsýsla að rónaheimilinu skuli valinn staður nákvæmlega 15 metra frá leikskóla á vegum borgarinnar.

Ég er alveg fylgjandi því að fjölbreytni mannlífsins (þar með talinn dapurleiki þess) sé ekki falin fyrir börnum, og ég vil síst af öllu að börnin mín alist upp í einhverri dauðhreinsaðri gerviveröld.

Hins vegar set ég stórt spurningamerki við það að nýkjörin borgarstjórn skuli ætla að skapa útileikjum barnanna minna umgjörð fylleríisröfls, slagsmála og lögregluheimsókna, og breyta dag leikvelli 2-5 ára barna í kvöld- og næturleikvöll fyrir sprautufíkla og drykkjumenn sem skilja guðmávitahvaða gúmmelaði eftir sig ofan í sandkassanum, eða í dekkjarólunni.

Stína ólst upp í næsta húsi við svona rónaheimili á vegum borgarinnar á Lokastígnum, og hún man alveg hvernig ástandið var þar á köflum.

(Til skýringar: Garpur er á þessum leikskóla, og Úlfrún mun væntanlega vera þar líka.)

Svör frá lesendum (3) | Varanleg slóð