Græjaður gæi (og svart iPod hulstur til sölu)

Skrifað 19. apríl 2007, kl. 18:04

Fjölskyldan skrapp til Englands um páskana. Þar braut ég odd af oflæti mínu sem iPod þverhaus og keypti svartan 80GB iPod (á Amazon.co.uk, nennti ekki að standa í búðarölti).

Með honum keypti ég svart iSkin eVo3 sílíkon hulstur sem er í alla staði frábært nema að það passar bara á 30GB iPod spilara. (Aulinn ég vissi ekki að það væri fýsískur stærðarmunur á 30 og 80GB útgáfunum.)

Þannig að ef einhver á 30GB iPod Video, og vantar svarta sílíkon hulsu til að rispu- og höggverja hann, þá á ég eina slíka á lausu í upprunalegum umbúðum.

Svo keypti ég lítinn og ljótan, en mjög fúnksjónal FM sendi sem tekur við hljóðmerki um mini-jack tengil. Þetta er hin mesta snilldar græja og nú get ég (og allir nágrannar mínir!) hlustað á tónlistina úr stofutölvunni (eða iPoddinum) í venjulegu útvarpstæki stilltu á FM 89,5 (sú bylgjulengd virðist sæmilega "þögul" í Reykjavík).

Þetta er sér í lagi sniðugt ef maður vill geta "flutt tónlistina með sér" milli hæða/herbergja án þess að skrúfa græjurnar í stofunni alla leið upp í 11.

Að endingu keypti ég litlar hi-fi græjur til að hafa í svefnherberginu okkar (og hlusta á tónlist úr FM sendinum ... eða iPod-inum), en þær eru ekki nægilega spennandi til að ég nenni að blogga um þær.