Færslur föstudaginn 23. febrúar 2007

Kl. 23:35: Vinsamleg skilaboð til þeirra sem setja spurningamerki við úthýsingu klámmógúlanna 

Þið sem teljið eitthvað óeðlilegt að beita lítt dulbúnum stjórnvaldsaðgerðum til að hefta komu fólks úr klámbransanum hingað til lands ... þið augljóslega:

• misnotið börn í laumi
• hatið frelsið
• eruð á móti framförum
• styðjið hryðjuverkamenn
• gangið í ullarpeysum
• búið í 101.

Skammist ykkar ógeðin ykkar!

Ég meina, "[þetta fólk] er á þessum tiltekna tíma komið í ákveðnum tilgangi, sem er andstæður því sem hentar íslenskum stjórnvöldum um þessar mundir"...

Svör frá lesendum (4) | Varanleg slóð

Kl. 23:15: Þennan dag fyrir ári 

...skaut lítil manneskja upp kollinum á miðju stofugólfinu okkar.

Þetta er búið að vera viðburðaríkt ár - ekki alltaf auðvelt, en samt ótrúlega gefandi.

Úlfrún byrjaði að labba um allt fyrir rúmum tveimur vikum. Það var eins og þá fyrst sæi hún tilganginn með þessum ferðamáta.

Á þrettándanum (í afmælisveislu hjá Óðni) tók hún fyrsta skrefið, og síðan þá hefur hún verið að labba smá og smá en það var eins og hún gerði það bara þegar hún gleymdi að skríða. Líkamlega getan var augljóslega til staðar, en viljinn/áhuginn enginn.

Þessi brosmilda og skemmtilega hnáta er eins árs í dag.

Megi hún lengi lifa!

Sendu þitt svar | Varanleg slóð