Færslur Þriðjudaginn 9. janúar 2007

Kl. 19:50: Gott Windows forrit til að afrita og samstilla skráarsöfn 

Ég var nýverið að leita mér að þægilegu forriti til að a) viðhalda öryggisafriti af tugþúsundum skráa á utanáliggjandi hörðum diskum og b) samstilla (synchronize ) tvö risastór skráarsöfn sem hvort um sig kunna að hafa breyst.

Forritið þarf ekki bara að fatta hvaða skrár hafa bæst við og hverjar hafa breyst, heldur líka hvaða skrám hefur verið eytt og fjarlægja þær þegar við á.

Eftir smá leit fann ég þetta ágæta og einfalda forrit Fullsync, sem mér sýnist að geri þetta allt og sé bara hreinn draumur í dós - og er ókeypis, og frjáls hugbúnaður.

Svo er Fullsync með einhvers konar "remote server" tengimöguleika sem mér sýnist að bjóði upp á að framkvæma öryggisafritun/samstillingu yfir internetið milli tveggja venjulegra Windows tölva - með örfáum músarsmellum. (Ég á eftir að sannreyna að þetta virki.)

Ef þessi netafritun er jafn einföld og mér sýnist, þá ætti ég meira að segja að geta lóðsað mömmu gömlu í Englandi í gegnum það að setja upp með mér þver-Atlantshafs-öryggisafritunarkerfi dauðans!

:-)

Sendu þitt svar | Varanleg slóð

Kl. 18:57: Jöfnun tónstyrks milli laga í Winamp 

Ég rakst um daginn á svoldið sniðugt í Winamp, sem heitir "replay gain" og snýst um það að Winamp (eða annað álíka forrit) mælir hljóðstyrkinn í hverju og einu lagi í tónlistarsafninu manns, og skrifar niðurstöðurnar fremst í hljóðskrána, en þær upplýsingar getur Winamp (og ýmis önnur tónlistarforrit) notað til að "leiðrétta" (jafna) tónstyrkinn milli ólíkra laga af ólíkum plötum.

Þessi snilldar fítus sparar manni að þurfa, sí og æ, að hlaupa til í ofboði og hækka eða lækka í græjunum þegar maður spilar samtíning af lögum héðan og þaðan.

Til að nýta þennan möguleika þar að gera tvennt:

1. Láta Winamp mæla tónstyrkinn á lögunum í lagasafninu

   • 

   Þú velur þau lög sem þú vilt láta mæla tónstyrkinn í, hægri-smellir á lögin, og velur "Send to: -> Calculate Replay Gain". (Ath. mælingin getur tekið þó nokkurn tíma.)

2. Segja Winamp að leiðrétta afspilunartónstyrk laganna í takt við mælinguna

   • 

   Opna valmyndina "Options -> Preferences" og velja "General Preferences -> Playback" og haka þar undir í reitinn "Use Replay Gain".

Ég er núna í óða önn að láta Winamp mæla öll lögin í tónlistarsafni heimilisins, og á eftir að skoða betur hvaða áhrif þetta hefur, og hvaða áhrif aðrar stillingar kunna að hafa á afspilunina.

Sendu þitt svar | Varanleg slóð