Færslur fimmtudaginn 7. desember 2006

Kl. 23:41: Ég-fór-í-bíó-blogg. 

Ég fór í bíó í kvöld, á Lars Von Trier myndina Boss of It All (Direktøren for det hele). Hún reyndist alveg bráðfyndin og skemmtileg. Líklega alfyndnasta "dogma" myndin sem gerð hefur verið - eða kannski er hún sú eina fyndna?

Ekki síst hafði ég gaman að þessu grunnstefi sem hugtakið "leikstjóri" er í gegn um alla myndina.

• Orðið leikstjóri kemur fyrir í titli myndarinnar (á frummálinu).
• Fyrsta senan í myndinni sýnir leikstjórann (þ.e. Trier sjálfan) í mynd, og hann talar til áhorfenda um myndina og söguþráðinn, í upphafi, á milli kafla og í endann.
• Í myndinni koma fyrir tveir forstjórar (directører). og annar þeirra er leikinn af þekktum kvikmyndaleikstjóra (Friðrik Þór)
• Enn einn leikstjórinn kemur í ljós þegar maður skoðar samskipti aðalpersónanna Ravns og Kristofers. Ravn á og rekur fyrirtæki en ræður leikarann Kristófer til að leika forstjóra fyrirtækisins, og leikstýrir honum í hlutverkinu.

Hitt sem ég tók eftir og velti fyrir mér, er hvað er Trier að segja um hlut "leikarans" í leikritum og kvikmyndum? Trúðurinn í sögunni - eina persónan sem er virkilega afkáraleg - er leikarinn (sem þykist vera forstjóri - directør). Hann er aumur og atvinnulaus áður en Ravn (leikstjórinn hans) ræður hann í hlutverkið; þvaðrar allan tíman út í eitt um leiklistina og hið listræna; fær í lokin óvænt öll völdin í sínar hendur og tekur samstundis heimskulegustu ákvörðun í heimi.

Mér hefur ekki fundist svona gaman í bíó í langan tíma.

Nánar um myndina

Svör frá lesendum (7) | Varanleg slóð