Færslur miðvikudaginn 19. apríl 2006

Kl. 19:40: Kaffitár selur hrábaunir 

Ég hafði um daginn samband við bæði Kaffitár og Te og kaffi og spurði hvort hægt væri að kaupa grænar, óbrenndar, kaffibaunir (hrábaunir) hjá þeim.

Kaffitár svaraði um hæl. Þau bjóða fólki að sérpanta hrábaunir með ca. dags fyrirvara og sækja þær í einhverja verslana þeirra (Kringlunni, Bankastræti, Þjóðminjasafni). Þau mæla með Kólombía baunum sem "auðveldum" í brennslu. 500g kosta 611 kr.

Te og kaffi hafði ekki svarað tölvupóstinum frá mér í dag, svo ég brá á það ráð að hringja. Eftir tvö símtöl (eitt í "fyrirtækið" og eitt í "verslunina") fékk ég að vita að þau selja líka hrábaunir í sérpöntun. Verslunarstjórinn var samt ekki viss hvert endanlegt verð yrði, en giskaði á "ca. 80-85% af verði brenndra bauna". Mér reiknast til að það þýði ca. 850 kr fyrir 500g.

Ég er búinn að panta mér 500g poka hjá Kaffitári, því þar fékk ég áberandi betri þjónustu, og ekki sakar að verðið er líka mun hagstæðara.

Til að byrja með ætla ég að prófa mig áfram með að brenna baunirnar í ofnskúffu (upp á gamla mátann) eða á wok pönnu. Samhliða því mun ég halda áfram að leita að hentugri poppkornsvél í verkið.

Svör frá lesendum (8) | Varanleg slóð