Færslur Þriðjudaginn 18. apríl 2006

Kl. 22:27: Vélaverkfræðikeppnin og íslensk vinnubrögð 

Á hverju ári sýnir sjónvarpið frá hönnunarsamkeppni vélaverkfræðinema þar sem ungt fólk lætur heimasmíðaðar uppfinningar leysa fyrirfram skilgreindar þrautir í braut. Að fylgjast með keppninni er hin besta skemmtun og augljóst að þátttakendur leggja mikla vinnu og hugkvæmni í verk sín.

Engu að siður, þegar ég horfði á keppnina í kvöld varð mér ljóst að eitt helsta einkenni keppninnar, ár eftir ár, er að yfirgnæfandi meirihluti þátttakenda mætir með hálfkláraðar vélar í keppnina, og að því er virðist að mestu óprófaðar.

Það segir sig sjálft að ef hönnuðurinn prufukeyrir vél 10 sinnum og einhverjir grundvallarþættir hennar virka ekki í 2-3 skipti, þá er augljóst að þar er eitthvað sem þarf að hugsa upp á nýtt.

Reynslan segir mér að íslenskir vélaverkfræðinemar séu ekki einir um þetta. Mig grunar að íslendingar upp til hópa geri sig seka um svona vinnubrögð þar sem allt er gert á síðustu stundu; mikilvægar breytingar gerðar og nýjungum bætt við tveimur mínútum fyrir frumsýningu; og prófanir álitnar óþarfi.

Svör frá lesendum (5) | Varanleg slóð