Færslur miðvikudaginn 29. mars 2006

Kl. 23:33: Hip hip hip - Sushi brella! 

Eftir að hafa loksins gert sushi í fyrsta skipti um daginn, þá fór ég að velta fyrir mér hvernig mætti gera nigiri sushi (hrísgrjónaklumpur undir þunnri fisksneið) á fljótlegri og snyrtilegri hátt.

Hefðbundna aðferðin er að möndlast með hrísgrjónaklessunar milli puttanna eina og eina í einu, en að upplagi Óla 'sushi-sensei' móðurbróðurs míns prófaði ég að nota litla ílanga kókómaltskeið úr plasti til að forma hrísgrjónin. Útkoman var afar áferðarfalleg og hreinleg en framkvæmdin var samt óþarflega seinleg.

Ég fór því á stúfana að leita mér að einhverju sem leyfði mér að forma marga, snyrtilega nigiri hrísgrjónaklumpa í einu handtaki.

Fyrsta búðin sem ég leitaði í var Kokka á Laugaveginum og þar fann ég þennan prýðilega OXO klakabakka, með 14 klakahólfum af akkúrat réttri stærð og lögun fyrir nigiri hrísgrjónaklumpa.

Með þennan bakka í farteskinu þarf bara að troða hrísgrjónum ofan í öll hólfin, þjappa sæmilega, snúa bakkanum á hvolf, og banka honum þéttingsfast í borðið nokkrum sinnum til að losa hrísgrjónaklumpana.

Voilá! 14 stykki tilbúin á örstuttum tíma!

Til að gera það auðveldara að losa hrísgrjónin úr hólfunum sótti ég borvél og boraði tvö 2mm göt í botninn á hverju klaka-hólfi nigiri-hólfi.

Konunum sem afgreiddu mig í Kokku fannst ég í bland nett geggjaður og mjög útsjónarsamur þegar ég útskýrði fyrir þeim hverju ég væri að leita að og hvernig þessi klakabakki væri, með smá breytingum, fullkominn í verkið.

Ég er ekki frá því að ég hafi gert daginn þeirra pínu lítið bjartari á eftir.

Þessi færsla fer í greinaflokkinn "Már föndrar".

Svör frá lesendum (22) | Varanleg slóð