Færslur Þriðjudaginn 21. mars 2006

Kl. 01:35: Glitnir - nýtt lógó með of jafnt stafabil 

Ég las um daginn í einhverju dagblaðanna þar sem prófessor Goddur gagnrýndi hönnunina á nýju lógói Glitnis (Íslandsbanka), og þá sérstaklega fráganginn á stafabilunum í merkinu (e. "kerning").

Hér er sú útgáfa merkisins sem Glitnir notar á heimasíðu sinni:

Það virðist aðeins hafa verið átt við stafabilin í þessari útgáfu, en samt sést að það er næstum jafnt bil milli allra stafanna í merkinu. Maður sér þetta enn skýrar á auglýsingunum í strætóskýlunum víðsvegar um borgina - hugsanlega er þar á ferðinni aðeins eldri útgáfa merkisins.

Gallinn í lógóinu sést best á því að þegar maður pírir augun aðeins, þá finnst manni eins og stafirnir "GL" og "NIR" sem hafa beina lóðrétta kanta, standi miklu þéttar en stafirnir í kringum L og T sem hafa ekki beina lóðrétta kanta.

Ég prófaði að eiga aðeins við merkið í myndvinnsluforriti, og jók í fljótheitum stafabilið á milli "GL" og "NIR".

Eins og sést á útkomunni verður heildaryfirbragð merkisins miklu jafnara og fallegra, og líkt og Goddur sagði, þá eru það svona smáatriði sem gefa lógóum fagmannlegt yfirbragð.

Ef maður skoðar t.d. lógó KB banka þá sér maður að þar hefur verið vandað til verksins og bilið milli N og K haft þó nokkuð stærra en hin.

Það tók mig ekki nema 10 mínútur að gera þessa bragarbót á þeirri útgáfu Glitnis merkisins sem ég fann á netinu, og ég veit að hönnður merkisins, sem hefur aðgang að frumteikningunni af merkinu í hárri upplausn, getur hæglega gert enn betur á jafn löngum tíma.

Svör frá lesendum (5) | Varanleg slóð