Færslur fimmtudaginn 5. janúar 2006

Kl. 23:30: Chili-rækju-hnetu-mangó-salatið 

Mmmm... Þetta er búinn að vera einn af mínum uppáhaldsréttum til að elda og borða heima síðan ég smakkaði hann fyrst sumarið 2004 á Thorvaldsen.

Lengi vel reiddi ég mig á innihaldslýsinguna í matseðlinum á heimasíðu Thorvaldsen, en nú er sá matseðill úreltur og kominn í tröllahendur (meira að segja web.archive.org finnur hann ekki). Í kvöld þurfti ég því að treysta algjörlega á gullfiskaminnið*.

Til minja ætla ég að skjala það sem ég gerði í kvöld**:

1. Slatti af kasjú-hnetum ásamt skvettu af vatni, slummu af sýrópi og smáslatta af nýmöluðum (eða fínt söxuðum) chilii sett í kastarholu. Hitað og hrært þar til vökvinn er soðinn niður.
2. 1-2 góðar lúkur risarækjur (eða bara ódýrar Bónus-rækjur úr frystinum :-) léttsteiktar upp úr ólífuolíu og fínt-rifnum hvítlauk. (Það má bæta chili út í þetta líka, ef vill.)
3. Smávegis ferskur, vel þroskaður mangó, skorinn í litla strimla. Ef hann er lítið þroskaður þá má einfaldlega sjóða hann í örbylgjuofni þar til strimlarnir eru mjúkir í gegn og kæla þá í köldu vatni. (Dósa-mangó má aðeins nota í brýnni neyð!)
4. Smá paprika og, ef vill, tómatar skorið niður í strimla. (1/2 - 1 lítil paprika, og 1-2 meðalstórir tómatar ætti að nægja.)
5. Smávegis af rauðlauk, skorinn í næfurþunnar skífur og skífurnar skornar í tvennt svo strimlarnir losni vel í sundur.
6. Góður slatti klettasalat (rucola) ásamt einhverju öðru bragðgóðu, gróft skornu, salati til fyllingar. (Spínat má nota ef magninu er stillt í hóf.)
7. Öllu ofantöldu er hent í hrúgu ofan í stóra salat skál og blandað saman ásamt smáslettu af góðri (einkar óspjallaðri) ólífuolíu og örlitlu af grófu flögusalti stráð yfir. (Mikilvægt: sleppið að salta frekar en að nota "venjulegt" salt.)

Borðist eitt og sér, með góðu brauði, eða einhverjum bragðmildum smárétti - t.d. avokado-strimlum með grófmöluðum pipar og slettu af sítrónusafa.

Þessi réttur er hreinn unaður.

*) Stína er ólétt þannig að hún man ekki neitt heldur. Sem betur fer varð þetta samt alveg prýðilega bragðgott!

**) Ég gleymdi að taka myndir, þannig að þær þurfa að bíða betri tíma.

Svör frá lesendum (1) | Varanleg slóð