Færslur sunnudaginn 13. nóvember 2005

Kl. 23:26: Höfuðfætlan "Pabbinn" 

Ein fyrsta höfuðfætlan leit dagsins ljós í dag á meðan ég var í vinnunni. Fyrsta útgáfa innihélt útlimi, augu og nef, en eftir smá samræður við mömmu sína ákvað Garpur, að eigin frumkvæði, að bæta við munni, eyrum, hári, tippi, og tveimur rasskinnum!

Aðrar persónur sem hann teiknaði voru: "mamman", "Logi Garpur", og "amma" - í tilefni þess að hún var að koma frá Kanada í morgun.

Mamma var beðin að klippa myndina út því honum hafði, að eigin mati, gengið of erfiðlega að klippa hinar persónurnar sjálfur, og svo þurfti náttúrulega að líma alla á svona efnisbúta eins og mamma var að nota í sína handavinnu.

Viðbót: Við enduðum á að taka myndina, smækka hana niður og raða í símunstur sem var svo prentað og silkiþrykkt á peysur, boli og púða sem við gáfum nánustu fjölskyldumeðlimum og einstaka vinum í jólagjöf.

Svör frá lesendum (4) | Varanleg slóð

Kl. 00:35: Jörðin skoðuð með Google Maps 

Sem barn gat ég legið tímunum saman yfir gömlum landabréfabókum og drukkið í mig nöfn landa og borga, og afstöðu hlutanna úr lofti. Mér verður stundum hugsað til þess hvað ég hefði gert ef ég hefði haft aðgang að Google kortinu, og velti fyrir mér hvað það verður geðveikt fyrir börnin mín (Garp og stúlkuna ófæddu) að geta gramsað í svona upplýsingum til að læra um veröldina.

Í kvöld fór ég í smá ferðalag. Ég byrjaði hérna heima, en komst fljótlega á flug um heiminn og fann ýmislegt magnað á ferð minni. Ég tók nokkrar myndir...

(Athugið að í flestum tilfellum borgar sig að "zooma" út til að skilja samhengi hlutanna.)

• Flugstöð Leifs Eiríkssonar
• Felubyrgi fyrir herflugvélar "varnarliðsins"
• Hvað er þetta?
• Húsið hennar mömmu í Ely
• Kristur á fjallinu í Ríó
• Eldfjallið Krakatá
• Skriðjöklar á Austur-Grænlandi
• Skeiðarárjökull
• Íbúðahverfi í Kaíró
• Rauðlitað iðnaðarsvæði við höfnina í Tokyo
• Fagurblá mengunarhreinsilón við Bohai flóa í Kína
• Óshólmar Lenu í Norður-Síberíu
• Vatnasvæðin í Norðaustur-Síberíu
• Fraktalamunstur í Himalaya
• Hið ótrúlega landslag sandanna á mörkum Saudi-Arabíu og S-Yemen:
  • mynd 1
  • mynd 2
  • mynd 3
• Snákurinn í frumskóginum
• Manngerði Amazon-snákurinn

Svör frá lesendum (6) | Varanleg slóð