Færslur fimmtudaginn 8. september 2005

Kl. 17:16: Feðraraunir nútímans 2 

Lítill tússlitakámugur fingur bendir á eigin fótlegg og spyr: "Hvernig er ég á litinn?"

"Húðin á þér er svona ljós gul - bleik - brún - öhm... það er svolítið erfitt að segja", segi ég, áður en ég átta mig á rétta svarinu: "Þessi litur er kallaður 'húðlitur'."

Ég hyggst að láta þetta svar gott heita, nema þá verður mér hugsað til skólasystkina hans og fer að velta fyrir mér hvernig ég ætli að fara að því að rökstyðja fyrir honum að húðin á helmingi þeirra sé ekki 'húðlit'.

Ég finn að móðurmálið mitt er á sumum sviðum komið fram yfir síðasta söludag og dreg í snarhasti orð mín til baka:

"Nei, ég ruglaðist, þessi litur heitir bara bleikur - 'húðbleikur'."

Þar með var málið ekki rætt meira.

Sendu þitt svar | Varanleg slóð

Kl. 09:43: Feðraraunir nútímans 

Lágum upp í rúmi og hlustuðum saman á Emil í Kattholti fyrir svefninn.

"Pabbi, hvað eru 'strákapör'?" spyr lítil rödd.

"Það þegar litlir strákar eru svolítið óþekkir og gera eitthvað sem má ekki gera - sérstaklega ef þeir gera það óvart" segi ég, og eftir smá umhugsun: "Maður meinar það voða fallega þegar maður kallar eitthvað strákapör."

"Strákapör..." endurtekur hann eilítið hugsandi.

"Já, en... öhm... stelpur geta líka alveg gert strákapör" segi ég í hálfgerðri vörn, og bæti við "það er bara kallað strákapör".

Hann þegir en horfir á mig eins og hann sé að velta fyrir sér hvort ég sé að stríða.

"Það má svosem alveg kalla það 'stelpupör' líka" segi ég að lokum. "Já já, það er alveg fínt nafn líka - stelpupör og strákapör".

Hann kinkar smá kolli, hallar sér aftur á koddann, og við höldum áfram að hlusta.

Svör frá lesendum (6) | Varanleg slóð