Færslur fimmtudaginn 30. júní 2005

Kl. 21:36: "Úrelt inn við beinið" 

Þórunn Sveinbjarnardóttir alþingismaður bloggaði 20. júní s.l. "Bleikur inn við beinið", um hátíðarhöldin á þingvöllum deginum áður, í tilefni þess að 90 ár eru liðin síðan konur fengu kosningarétt.

Ég man að, nokkrum dögum fyrr, þegar ég heyrði af þessum hátíðarhöldum í útvarpinu, þá fór ég að flissa. Ekki af því að mér þætti tilefnið ómerkilegt (síður en svo) heldur af því mér fannst svo kjánaleg tilhugsun að einu sinni hafi konur ekki mátt kjósa. Hverjum datt sú fásinna eiginlega í hug?

Ég áttaði mig þá á því hvað heimurinn hefur breyst mikið, og hvað heimurinn sem sonur minn fæðist inn í er ólíkur þeim sem foreldrar mínir, afar og ömmur fæddust í.

Þegar ég var lítill spiluðu hvorki konur né stelpur fótbolta að neinu viti, en svo breytast tímarnir hratt að litla systir mín, Hildur 9 ára, horfði á mig eins og ég væri hálfviti þegar ég sagði henni frá því í fyrra að mér þætti svoldið flott hvað hún og vinkonur hennar á Pæjumótinu væru flottar að æfa fótbolta og spila með strákunum.

Það er m.a. þess vegna sem mér finnst þetta blogg hennar Þórunnar, "Bleikur inn við beinið" alveg hrikalega lummulegur nöldurfemínismi af gamla skólanum. Karlmenn eru vondirvaldið, og umsjón jafnréttismála er "hefðbundið kvennastarf". Hún virðist dæma framgöngu Árna ráðherra eingöngu út frá kynferði hans, sem í þessu tilfelli reyndist rangt.

Svona málflutningur er móðgun við karla jafnt sem konur, og gerir ekkert annað en að viðhalda löngu úreltri innrömmun jafnréttisbaráttunnar sem "valdatafls tveggja stríðandi fylkinga".

Ég held að Þórunn ætti að athuga með að endurnýja "sixtís" kynjagleraugun sín. Hún virðist vera hætt að sjá nokkuð með þeim.

Svör frá lesendum (3) | Varanleg slóð