Færslur föstudaginn 30. apríl 2004

Kl. 06:40: Málfræðisamanburður með Google 

Það má nota Google (eða sambærilega leitarvél) til ýmissa verka. T.d. má gera úttekt á tíðni málfræðivillna hjá ólíkum hópum netverja.

T.d. má sjá að notendur Blogspot.com segja áberandi oftar "mér langar" en netverjar almennt:

• "mig langar": 26.200 síður
• "mér langar": 901 síður

Villutíðni almennt: 3,32%

• "mig langar site:blogspot.com": 3700 síður
• "mér langar site:blogspot.com": 290 síður

Villutíðni Blogspot.com notenda: 7,27%

Hins vegar ef við skoðum misritun orðasambandsins "ég hlakka til", þá koma Blogspot notendur aðeins betur út en hin almenni netverji:

• "Ég hlakka til": 3950 síður
• "Ég hlakkar til": 12 síður
• "Mér hlakka til": 42 síður
• "Mér hlakkar til": 235 síður

Villur samtals almennt: 6,82%

• "Ég hlakka til site:blogspot.com": 965 síður
• "Ég hlakkar til site:blogspot.com": 0 síður
• "Mér hlakka til site:blogspot.com": 14 síður
• "Mér hlakkar til site:blogspot.com": 41 síður

Villur samtals hjá Blogspot.com notendum: 5,39%

Ég veit ekki með aðra, en mér finnast svona rannsóknir dáldið sniðugar.

Svo getur líka verið dáldið gaman að hreinlega lesa hvað fólk langar og til hvers það hlakkar. Með meiri vinnu væri líka hægt að skera úr um það hvort fólk sem er gott í málfræði hafi að meðaltali aðrar langanir, eða hlakki til annara hluta, en fólk sem þjáist af þágufallssýki... :-)

Einhvernveginn grunar mig að fyrr eða síðar muni einhver byggja einhverjar fræðilegar niðurstöður (t.d. BA/BS ritgerð) á tölulegum niðurstöðum fengnum úr almennri leitarvél á borð við Google.

Svör frá lesendum (9) | Varanleg slóð