Færslur föstudaginn 16. apríl 2004

At 17:07: Disclaiming 

I like Matthew Thomas' Disclaimers. Every item in his list apply to me.

Cool.

Also good by Matthew: Discussions in unwanted places, on how 'discussions' tend to form naturally in social (software) situations.

Post your Comment | Permalink

Kl. 11:55: Bendiblogg 

• Svansson prófar undirskrifalistana og kemst að því að ólíkt mótmælalistanum, þá samþykkir stuðningslistinn margendurteknar undirskriftir frá gervifólki. Úbs!

• Gunnar Gríms spyr skemmtilegrar spurningar varðandi 'Stóra hæstaréttardómaramálið':

  [Ef dómstólar staðfesta úrskurð jafnréttisráðs um að ráðningin hafi verið ólögleg, en dómarinn situr áfram] "erum við þá ekki með ólöglegan hæstaréttardómara? Er það hægt?"

  Svarið við þessari spurningu er ekki eins augjóst og það virðist í fyrstu. :-)

• Gunnar bloggar svo líka um hleranir lögreglu á símtölum, samvinnuþýðleika Landsímans í slíkum málum (krefjast víst ekki dómsúrskurðar), og hugmyndir manna um að fella niður kröfuna á dómsúrskurð fyrir slíkar hleranir. Gunnar spyr:

  "Nú vilja þeir lögfesta símahleranir án dómsúrskurðar! Reyndar þurfa þeir að fá úrskurð eftir á en [ef dómurinn hafnar beiðninni,] hvað ætla þeir þá að gera við það sem þeir hleruðu? Afhlera það? Hreinsa úr minninu á sér líka? Hvílíkt bull!"

  Góð spurning :-)

• Svavar gefur Neytenda- og umhverfisverndartipp:

  "Fyrir hvert epli sem þið kaupið frá Svíþjóð, Englandi eða Hollandi hafa farið x margir olíulítrar í flutninga. En fyrir Hvert epli sem þið kaupið frá Kína hafa farið 6x margir olíulítrar í flutninga. Þótt eplin kosti það sama eruð þið að eyða verðmætu eldsneyti og auðlindum jarðar í hégóma og vitleysu."

  Svipað gildir um fjölmargar neysluvörur, s.s. heimilistæki. Maður á helst að kaupa dýra og vandaða hluti sem endast lengi (það má t.d. taka lán eða nota afborganir til að létta sér greiðslubyrðina), frekar en að kaupa ódýra hluti sem endast stutt. Til lengri tíma litið eru ódýru hlutirnir jafn dýrir og þeir dýru (1/6 af verðinu, 1/6 af endingunni) en maður er búinn að eyða mörgum sinnum meira magni af náttúruauðlindum (málmur, plast, bensín í flutninga, etc.) heldur en ef maður hefði keypt einn dýran endingargóðan hlut.

  Ég var fyrir nokkrum dögum síðan að sækja gamla trausta Frigadaire ísskápinn okkar Stínu úr viðgerð (skipt um úrbrædda pressu). Ísskápurinn var smíðaður í Bandaríkjunum 15. september 1945, og kostaði líklega mörg mánaðarlaun venjulegs verkamanns á sínum tíma. Hann kælir mjög vel, eyðir ekkert sérstaklega miklu rafmagni, í æðum hans rennur núna nýr og umhverfisvænn kælimiðill, og hann mun líklega halda áfram að þjóna hlutverki sínu í einhverja áratugi í viðbót.

• Svavar óskar eftir rebelum í tónlistamyndband. Ég er búinn að bjóða mig fram sem rebell af tegundinni 'pólitískt viðrini' sem dansar ekki ('stelpur dansa'). Lengi lifi rokkið!

• Brúðarbandið spilar í kvöld á Grandrokk. Ókeypis inn!

Sendu þitt svar | Varanleg slóð

Kl. 09:27: Útlendingaæsingur 

Frumvarp Dómsmálaráðherra um breytingar á útlendingarlögum hefur vakið sterk viðbrögð. Settir hafa verið upp undirskriftalisti gegn frumvarpinu og annar til stuðnings því.

Ég setti mitt nafn á mótmælalistann og hvet aðra til að gera það sama.

Mér finnst þetta frumvarp samt alls ekki alslæmt, og eins og Friðjón R. Friðjónsson bendir á í grein á Frelsi.is, þá er sumt af því sem andstæðingar frumvarpsins mótmæla atriði sem hafa verið í gildi í útlendingalögunum í mörg ár. Engu að síður tel ég, þótt frumvarpið bæti á köflum litlu við núgildandi lög, að mótmælin sýni einmitt að ýmislegt í þeim lögum og þessum breytingatillögum dómsmálaráðherra, einflaldlega stríðir gegn siðferðiskennd stórs hluta þjóðarinnar.

Þó svo að stjórnarskráin og almenn lög í landinu fjalli fyrst og fremst um íslenska ríkisborgara, og strangt til tekið þurfum við ekki að láta sambærilegar leikreglur gilda um útlendinga/innflytjendur, þá finnst fólki að sumt eigi einfaldlega að gilda jafnt um alla, sama hvaðan þeir koma og hvers vegna. T.d. virðingin fyrir hjónabandi fólks, jafnvel þótt annað þeirra sé útlendingur yngri en 24 ára (gisp!). Þetta og margt annað í frumvarpinu finnst fólki fáránlegt og óréttlátt.

Mótmælin sýna einfaldlega að bæði frumvarpið og gildandi lög um útlendinga eru á vissan hátt úr takti við réttlætiskennd íslendinga, og ég efast ekki um að margir þeirra sem skrifa undir mótmælin vilja gjarnan sjá meiri og opnari umræðu og miklu róttækari tillögur (og betur ígrundaðar) um úrbætur í málefnum útlendinga á Íslandi.

Frumvarpið og viðbrögðin við því bera að vissu leyti vitni pólitískum þankagangi dómsmálaráðherra, sem virðist ekki alltaf vera í takti við skoðanir kjósenda og almennings. Þó hef ég samt örlítið á tilfinningunni að lætin sem orðið hafa yfir þessu útlendingalagafrumvarpi, séu að einhverjum hluta sprottin úr röðum pólitískra andstæðinga hans sem vilja gera sér mat úr lélegu frumvarpi til að afla honum óvinsælda. Gæti það verið?

Samt, það eitt að Félag "framfarasinna" skuli "fagna frumvarpinu", hlýtur að segja segja sína sögu, og eins og áður sagði þá skrifaði ég undir mótmælin gegn frumvarpinu.

Engu að síður fagna ég þeirri umræðu sem skapast hefur um þessi mál vegna frumvarpsins, og vona að á því verði gerðar róttækar breytingar til gagns.

Svör frá lesendum (7) | Varanleg slóð