Færslur föstudaginn 21. nóvember 2003

Kl. 17:25: Blogggátt Finna.is - leiðir til úrbóta 

Í framhaldi af opna bréfinu mínu til Finna.is, þá fékk ég vingjarnlegt símtal frá Katrínu sem vinnur hjá Finna.is og sér um blogggáttina þeirra. Niðurstaðan var eins og mig hafði hálfpartinn grunað: Ákvörðunin að birta bloggfærslur í heild sinni var ekki hugsuð til enda, og eftir mis-harðorðar og mis-alvarlegar ábendingar frá bloggurum þá hafa þau séð villu síns vegar og ætla að endurskoða framsetninguna á blogggáttinni. Jei! :-)

Eins og Katrín segir, þá vilja flestir (en þó ekki alveg allir) bloggarar að skrifin þeirra fái sem víðasta lesningu. Ég sjálfur er engin undantekning á því. Hins vegar er mikill munur á því að birta stuttan útdrátt eða tilvitnun og vísa á varanlega slóð á heimasíðu bloggarans, og því að endurbirta færsluna í heild sinni á heimasíðu Finna.is.

Í því liggja mistök Katrínar og félaga hjá Finna.is og í því liggur jafnframt lykillinn að því hvernig má halda rekstri blogggáttarinnar áfram í sátt og samlyndi við fólkið í blogglandi.

Leiðir til úrbóta

1. Finna.is þurfa að hætta að birta færslur í heild sinni, nema fyrir liggi yfirlýst samþykki viðkomandi bloggara.
2. Í stað fullra færslna þurfa ritstjórar blogggáttarinnar að takmarka sig við titil og inngangsorð hverrar blogggreinar (eða krassandi tilvitnun) og vísa svo áfram á varanlega vefslóð inn á vefsvæði viðkomandi bloggara.

Ef þessum einföldu vinnureglum er fylgt, og ef ritstjórnin er dugleg að finna og raða saman spennandi efni í blogglandi, þá getur blogggátt á Finna.is auðveldlega orðið mjög spennandi viðkomustaður fyrir stóran hóp fólks sem hefur hvorki þekkingu né nennu til að fylgjast með öllu í blogglandi og eins fyrir þá sem vilja víkka aðeins út blogg-sjóndeildarhringinn sinn með hjálp blogggáttarinnar.

Mér finnst hugmyndin prýðileg hjá þeim Katrínu og Finna.is, enda eru nokkur ár síðan ég byrjaði fyrst að hvetja menn á borð við Björgvin og Geir Hrekkjusvín, og Nagportal Egil til að setja upp svona blogggáttir með ritstjórn. Þær hugmyndir mínar fengu aldrei neinn hljómgrunn og því fór svo að ég gafst upp, en núna get ég glaðst yfir því að einhver annar hefur fengið þessa góðu hugmynd og ætlar þar að auki að framkvæma hana!

Svör frá lesendum (6) | Varanleg slóð

Kl. 16:32: Höfundaréttur og blogg 

Ég stóðst ekki mátið að senda alvöruþrungið bréf til Finna.is eftir að ég sá hvernig þeir eru að horfa framhjá höfundarétti bloggara, eins og skrifin okkar séu bara ókeypis auglýsingasölumateríal fyrir þá. Blah. :-)

Samkvæmt Matta þá eru fleiri en Finna.is sem gera svona. Ullabjakk.

Mér finnst bara svo móðgandi að þeim skuli ekki hafa dottið í huga að spurja leyfis - þó ekki væri nema. Það hefði verið svo auðvelt að nálgast þessa hluti í miklu meiri sátt við bloggsamfélagið.

Uppfært: Ég fékk símtal frá Katrínu sem sér um blogggáttina á Finna.is. Það fór vel á með okkur og ég mér heyrðist á henni að þau ætluðu að endurskoða framsetninguna hjá sér þannig að allir yrðu sáttir. Mér finnst það frábært því ég held að þetta geti orðið alveg bráðskemmtileg síða hjá þeim.

Sendu þitt svar | Varanleg slóð

Kl. 16:12: Opið bréf til Finna.is (vegna höfundaréttarbrots) 

To: finna hjá finna.is
Subject: Blogg og höfundaréttur

Til þess er það varðar hjá Finna.is

Ég sé að á blogggáttinni ykkar (http://www.finna.is/finna/blogg/) birtið þið dagbókarfærslu eftir mig óbreytta og í heild sinni. Þetta gerið þið án míns leyfis og án þess vísa beint á upprunalegu greinina, en hvort tveggja er skilyrði sem ég set fyrir slíkri notkun á efni eftir mig.

Ég sé ennfremur að þið birtið í heild sinni færslur eftir fleiri bloggara sem veit fyrir víst að sumir hverjir hafa ekki gefið leyfi sitt fyrir þessari notkun á þeirra efni.

Samkvæmt Íslenskum höfundalögum er réttur minn hvað þetta varðar 100% skýr, og að þeim sökum krefst ég þess að allar færslur eftir mig verði fjarlægðar af síðunni ykkar, a.m.k. þar til okkur hefur samist um sanngjarna greiðslu fyrir birtingarréttinn. Í millitíðinni er ykkur að sjálfssögðu frjálst að vísa á greinar eftir mig og birta fyrirsögn og útdrátt eins og hann birtist í RSS skránni fyrir dagbókina mína.

Ég er fyllilega tilbúinn að ræða sanngjarnt endurgjald fyrir þau afnot sem þið hafið nú þegar haft af skrifum mínum, og möguleg afnot ykkar af efni eftir mig í framtíðinni. Ég á von á að við komumst að sanngjarnri niðurstöðu sem báðir aðilar geta verið sáttir við.

Virðingarfyllst,
Már Örlygsson

Svör frá lesendum (12) | Varanleg slóð