Færslur Þriðjudaginn 18. nóvember 2003

Kl. 12:50: Fréttir.com í "delete"-ham 

Steingrímur "ritstjóri" sem bloggar á Fréttir.com hefur verið ötull gagnrýnandi frétta-/útgáfusiðferðis í íslenskum fjölmiðlum.

Nú er spurt: hvaða vinnureglur setur Steingrímur sjálfum sér? Telur hann það við hæfi að eyða fyrirvaralaust út löngum svarhala í blogginu sínu og læsa umræðunni án frekari skýringa. (Svarhalinn sem um ræðir var aftan í færslu dagsins í dag, Norðurljósum skipt upp?.)

Athugið að ég dreg ekki í efa rétt Steingríms til að eyða og breyta eins og honum sýnist því efni sem birtist á síðunni hans. Ég er bara að velta fyrir mér hvort honum þætti ekki við hæfi að setja sér skýrar vinnureglur í þeim efnum og hafa þær uppi á borðinu - sérstaklega í ljósi þess að hann a) virðist vilja láta taka mark á blogginu sínu eins og það sé "fjölmiðill" og b) skýtur gjarnan föstum skotum á vinnuaðferðir og útgáfusiðferði annara "fjölmiðla".

Mér finnst þetta í hæsta máta hallærislegt.

Svör frá lesendum (26) | Varanleg slóð

Kl. 11:29: Með náladofa í ritbeininu 

Suma daga langar mig til að skrifa en kem engum hugsunum í orð. Líkt og ég sé með deyfingu í kjaftinum og sé að reyna að tala. Eins og öll orð séu kauðsk og óspennandi. Einfaldar hugsanir velta og flækjast og sitja fastar í óendanlega djúpum einvíðum orðapolli.

Á slíkum dögum einbeiti ég mér bara að öðrum hlutum.

Sendu þitt svar | Varanleg slóð