Færslur föstudaginn 14. nóvember 2003

Kl. 00:33: Gömul kynni í skráargati Internetsins 

Alltaf gaman að rekast á vefdagbækur fólks sem maður þekkir/þekkti mjög vel en hefur ekki átt nein samskipti við að ráði í mörg ár. Tvö nýleg dæmi um slíkt hjá mér: Jenný gamla vinkona og Steini frændi.

Bloggið hennar Jennýjar rak á fjörur mínar fyrir nokkru síðan, og ég hafði mjög gaman að því að lesa frásagnir hennar úr móðurhlutverkinu og fá ofurlitla innsýn í hennar hagi í dag. Reyndar höfum við rekist á hvort annað af og til gegnum árin og skipst á fréttum þannig að "uppgötvunin" var kannski ekki eins sterk og hún hefði getað verið, en þetta var samt gaman.

Mér telst hins vegar til að það séu orðin rúmlega tíu ár síðan leiðir okkar Steina lágu síðast saman að einhverju marki. Við vorum þó nokkuð samrýmdir sem krakkar (þessi óhjákvæmilegi félagsskapur jafnaldra systrasona), og þó allur þessi tími sé liðinn þá kemur mér ekkert á óvart að sjá hversu skemmtilegur penni hann Steini er á köflum, jafnvel þótt hann skrifi á öðru tungumáli en móðurmálinu. Hann er enn jafn hugmyndaríkur og skapandi, og alltaf stutt í sögumanninn.

Sendu þitt svar | Varanleg slóð