Færslur fimmtudaginn 23. október 2003

Kl. 18:18: Halldór E = Elli! 

Fyndið hvað smæð heimsins getur alltaf komið manni á óvart - aftur og aftur og aftur.

Núna áðan var ég að fatta að þessi Halldór sem ég hef verið að skiptast á skoðunum við um trúmál undanfarið er maður sem ég kannast við undir nafninu Elli, og er vinur Hrafnkels vinar míns. Halldór Elías er með heimasíðu. Halló Elli

Svör frá lesendum (5) | Varanleg slóð

Kl. 17:38: Joe Clark um aðgengi á vefnum 

Ég er búinn að vera að lesa í gegn um Building Accessible Websites á heimsíðu höfundarins, Joe Clark, en bókin er sérlega góð lesning fyrir vefforritara og hönnuði.

Fróðlegir kaflarnir um noktun á myndum, innsláttarreitum og skráningarsíðum, og mörkun á gagnatöflum

Mér sýnist að mínar vinnuaðferðir séu almennt að fá fína einkunn hjá Joe, en þó eru alltaf inn á milli smáatriði sem ég hef ýmist steingleymt eða aldrei heyrt um áður. Sér í lagi vissi ég ekki af tilvist scope="" stillingarinnar og af hverju hún er sniðug á <th> reiti í töflum.

Sannkallað nördanammi!

Sendu þitt svar | Varanleg slóð

Kl. 17:07: Prik í kladdann 

Ég fékk eftirfarandi í tölvupósti áðan frá starfsmanni fyrirtækis sem ég er mögulega kannski að fara að veita ráðgjöf og aðstoð við að gera vefsvæðið sitt þjált í notkun og aðgengilegt (e. accessible) fyrir fólk óháð fötlun og tækjakosti.

"Þér að segja, þá höfum við farið á ófáa fundi í ár, og ég held við séum sammála um það að við höfum sjaldan farið á jafn gagnlegan og þarfan fund. Þannig að þú færð stórt prik í kladdann."

Það er ofboð gaman að fá svona sætt hrós frá fólki eftir að hafa "hrært í hausnum á því" yfir hádegismat.

Sendu þitt svar | Varanleg slóð