Færslur fimmtudaginn 16. október 2003

Kl. 23:14: Battl með barmmerkjum 

Mér fannst það sniðugt hjá femínistafélaginu að smætta vændisumræðuna niður í einfalt slagorð sem komst á barmmerki, sem þær síðan buðu karlmönnum að kaupa.

Mér datt í hug að kannski mætti nota þetta sama form til að skapa söluvöru sem hægt væri að pranga inn á aðstandendur "ég kaupi konur" barmmerkisins og koma þannig slagorðabattlinu á nýtt dýpi... :-)

Þeir sem hafa áhuga á að búa til sín eigin slagorðabarmmerki (hvort sem er græn eða bleik) geta sótt Photoshop skjal sem ég bjó til (154KB), en þar er allt tilbúið - bakgrunnar, leturgerðir, o.þ.h.

Svör frá lesendum (2) | Varanleg slóð

Kl. 10:04: Allir sem nota Jabber rétti upp hönd 

Ef þið eruð með Jabber notendanafn og eruð ekki á listanum yfir íslenska jabber notendur, sendið mér þá endilega a) tölvupóst b) jabber spjallskeyti c) svar hér fyrir neðan, svo ég geti bætt ykkur á listann.

Ég veit að listinn nær í dag ekki nema yfir ca. 50% af skráðum notendum á jabber.klaki.net og þá eru ótaldir þeir sem eflaust hafa áður skráð sig á öðrum Jabber þjónum.

Netfangið mitt er mar hjá anomy.net og jabberfangið mitt er mar hjá jabber.klaki.net.

Sendu þitt svar | Varanleg slóð

Kl. 01:13: Vissir þú... 

...að það er ljótt, ljótt, ljótt að brjóta gegn skilmálum GPL hugbúnaðarleyfisins og setja notkunarhöft á hugbúnað hvurs höfundar hafa, í krafti höfundaréttar síns, kosið að gefa frjálsan með GPL skilmálum?

Ef ekki, þá veistu það núna. :-)

Svör frá lesendum (7) | Varanleg slóð

Kl. 00:43: Er sænska leiðin góð? 

Í framhaldi af hugleiðingum mínum um sænsku leiðina svokölluðu, þá þætti mér fróðlegt að vita hvað fylgismenn nýja frumvarpsins, sem leggur til að sænska leiðin verði farin hér á landi, hafa að segja um það sem kom fram í kvöldfréttum RÚV, að sænskur mannfræðingur sem kannað hefur málin heldur því fram að aðstæður vændiskvenna í Svíþjóð hafi versnað eftir tilkomu laganna.

Í vor átti ég þó nokkur samtöl um vændi og sænsku leiðina við fólk í femínistafélaginu og hjá Stígamótum. Ég var forvitinn og spurði aftur og aftur hver reynslan hefði verið í Svíþjóð - hvort aðstæður vændiskvenna hefðu eitthvað batnað við að "viðskiptavinirnir" voru skilgreindir sem glæpamenn, etc. Enginn virtist hafa nein svör við þessum spurningum mínum. Ýmist var fullyrt að fylgismenn frumvarpsins í Svíþjóð (pólitíkusar) væru ánægðir með breytinguna sem augljóslega segir manni ekki neitt, eða því borið við að enn væri ekki liðinn nægur tími til að áhrifin væru almennilega ljós. Þegar ég spurði hvort ekki væri eðlilegt að bíða átekta þar til einhver reynsla væri komin á sænsku leiðina í svíþjóð, þá var svarið einatt: "Nei, það er enginn ástæða til þess að bíða, við þurfum að breyta lögunum strax, aðalatriðið er að fá opinbera/lagalega viðurkenningu á því að vændi sé ofbeldi". Mér fundust þetta ekki góð svör.

Einhvern veginn grunar mig að einhverjir fylgismenn sænsku leiðarinnar hér á landi séu nú þegar búnir að stimpla sænska mannfræðinginn sem ómarktækan kvenhatara sem ekkert veit. ;-)

P.S. Bjarni birti um daginn langan pistil með sínum hugleiðingum um vændisvandann.

Sendu þitt svar | Varanleg slóð

Kl. 00:15: Nördavísanir 

Tryggvi gerir skemmtilegar tilraunir með Trackback sendingar úr WinAmp og iTunes.

Matti miðlaði okkur um daginn af dagbókarfikti sínu með "server side includes" (ssi) til að stjórna því hvernig Google skráir síðuna hans. Bráðsnjallt!

Svo voru Matti og Tryggvi að fíla Movable Type viðbótina "Rebuild Type Mod" sem gefur MT notendum nokkuð mikla stjórn yfir því hvaða síður eru uppfærðar þegar svör berast eða efnið á síðunni er uppfært. Ágætt fyrir þá sem nenna að standa í svoleiðis.

Skráningarleiðbeiningar fyrir þá sem vilja nýta sér opna Jabberhúsið á Klaki.net:

• Haffi: Fyrir þá sem nota Exodus spjallforritið
• Tryggvi: Fyrir þá sem nota Gaim spjallforritið

Hverju er ég að gleyma? Hvaða nýlegar íslenskar nördavísanir hafa mér yfirsést?

Svör frá lesendum (1) | Varanleg slóð