Taktu öryggisafrit af gögnunum þínum fíflið þitt!

Skrifað 23. september 2003, kl. 08:51

Bjarni skorar á Íslendinga að gera átak í öryggisafritun gagna sinna. Ég tek undir það með honum.

Fyrir tveimur dögum keypti ég mér nýjan 120GB harðan disk í heimilistölvuna ásamt diskasleða sem leyfir mér að taka í handfang og kippa diskinum úr tölvunni með einu handtaki þegar ég er búinn að afrita öll gögnin á tölvunni inn á hann, og setja hann í gæslu í öðrum bæjarhluta.

Við eigum einhverja tugi þúsunda stafrænna ljósmynda, erum búin að eyða einhverjum vinnuvikum samanlagt í að koma tónlistarsafninu okkar á stafrænt form (.ogg) og erum með bókhald, dagbókarfærslur, vinnugögn og allan fjandann annan á tölvunni.

Jarðskjálftar, eldsvoðar, innbrot, vélbúnaðarbilanir, mannleg mistök, og margt fleira getur valdið því að þessi stóri massi af ómetanlegum persónulegum gögnum glatist í einu vetfangi. Það væri bara heimska að eiga ekki allt í tvíriti a.m.k. og helst í þrí- eða fjórriti.

Meira þessu líkt: Hugbúnaður, Varanleiki & URL.