Færslur miðvikudaginn 10. september 2003

Kl. 20:06: Stóra DHTML áskorunin 

Ég hef oft og mörgum sinnum í gegnum tíðina pirrað mig á því hvað DHTML felligardínuvalmyndir eru alltaf...

1. ...óaðgengilegar (fötluðum, leitarvélum, frumstæðum vöfrum).
2. ...sóðalegar hvað varðar HTML kóðann í valmyndunum.
3. ...þungar og luralegar í hleðslu (10-20KB+ javascript, etc. etc.)

Ég sá fyrir skemmstu nokkuð áhugaverða lausn sem virkar fínt sem svona lóðrétt smellivalmynd sem opnast og stækkar/síkkar eftir því sem á hana er smellt:

Ég er búinn að prófa mig áfram með að útvíkka þessa DHTML lausn þannig að hún virki fyrir láréttar valmyndir og mouseover valmyndir, með sæmilegum árangri, en samt er langt í land með að útkoman sé almennilega frambærileg. Málið er að ég er ekki nægilega klár javascript forritari. (hei, maður verður að fá að vera lélegur í einhverju ;-)

Því langar mig að setja þetta vandamál mitt fram sem opinbera áskorun til allra þeirra sem þykjast vera sleipir í DHTML, CSS og javascript í þeirri von að útkoman verði eitthvað sem allir geta grætt á.

• Höfundarnir fá ómælda frægð og virðingu (mína a.m.k.).
• notendur vefsvæðanna okkar fá léttari og aðgengilegri valmyndir.
• við vefforritararnir verðum fljótari að útfæra góðar DHTML valmyndir.

Áskorunin er því: Getur þú betrumbætt þessar DHTML valmyndir?

Með von um spennandi viðbrögð.

Svör frá lesendum (8) | Varanleg slóð

Kl. 11:49: Gamlar bloggminningar II 

Ég held áfram að mjatla inn gömlum bloggfærslum. "Nýjustu" mánuðirnir í safninu eru júlí 1999 og ágúst 1999.

Í júlí 1999 uppgötvaði ég t.d. að hljómsveitin Sigur Rós rokkar, velti fyrir mér eiginleikum vefathugasemdakerfa og kostum varanlegra vefauglýsinga og Túrid vinkona mín varð mamma.

Í ágúst pirraði ég mig á Sjálfhverfum bloggurum (á þessum tíma var íslenski bloggheimurinn ekki orðinn til), fór í tveggja vikna frí í Kanada og Stína vann íslensku Smirnoff fatahönnunarkeppnina.

Gaman að grúska í svona gömlum skrifum.

Svör frá lesendum (2) | Varanleg slóð