Gamlar bloggminningar

Skrifað 1. september 2003, kl. 22:22

Nýkomnir aftur í leitirnar og leitarvélarnar, tveir fyrstu mánuðirnir sem ég bloggaði:

• Maí 1999
• Júní 1999

Þessar færslur hafa bara verið til sem öryggisafrit í um 18 mánuði, eða síðan dagbókinni var kippt úr samandi af þáverandi hýsingaraðila í ársbyrjun 2002. Ég er núna smátt og smátt að mjatla þessum gömlu færslum inn, einum og einum mánuði í senn.

Þarna er að finna fullt af gullmolum og minningum sem ylja mér um hjartaræturnar. Í maí 1999 var Blogger.com ekki orðinn að veruleika, og hugtakið "weblog" var rétt í þann mund að ná fótfestu úti í hinum stóra heimi. Ég man enn þessa skrýtnu upplifun af fatta að það væri til sérstakt hugtak fyrir það sem ég var að gera. Ég skrifaði meira að segja dagbókarfærslu um það. Á síðunni Blogtree.com kemur fram hvaða vefsíður ég var að lesa á þessum tíma sem voru áhrifavaldar í að etja mér út í dagbókarskrifin ("parent blogs" listinn).

Árið 1999 var netbólan nálægt því að ná hámarki og ótrúlegasta fólk virtist trúa því statt og stöðugt að það yrði óstjórnlega ríkt á því að gera eitthvað á netinu og veraldarvefnum. Gamli skeptíkerinn ég var aldrei alveg sannfærður. Það má segja að gróðahugmyndir manna á þessum tíma hafi verið dáldið líkar viðskiptaáætlun nærbuxnaálfanna í South Park, en hún var eitthvað á þessa leið: 1) Stela nærbuxum 2) ??? 3) Gróði.

Önnur dagbókarfærslan mín, rituð 22. maí 1999, var stutt hugleiðing um þessa aðgerð að hugsa upphátt á opinni vefsíðu. Mér finnst í dag dáldið skemmtilegt að lesa lokaorðin með hliðsjón af því hvernig málin hafa þróast síðan þá:

"Það að hugsa upphátt á vefsíðu sameinar alla kosti þess að hugsa í einrúmi, öskra ein uppi á heiði, tala við besta vin sinn og að hlaupa allsber yfir Laugardalsvöllinn á landsleik. Ég veit að ég á eftir að nýta mér þennan sérstæða eiginleika markvisst í framtíðinni og mig skal ekki undra ef menn muni almennt átta sig á og viðurkenna þennan eiginleika vefsins."

Skemmtilegt.

Meira þessu líkt: Sögur og minningar, Um þessa síðu, Útgáfa.