Færslur sunnudaginn 24. ágúst 2003

Kl. 20:32: Þrek og tár (MP3) 

Fokk höfundaréttur. Þetta gamla lag í flutningi Erlu Þorsteins og Hauks Morthens er bara svo undursamlega fallegt að ég verð að deila því með ykkur: Þrek og tár.

Ég fæ hroll í hvert skipti sem ég hlusta á þetta.

Mér áskotnaðist þessi MP3 skrá gegnum netið, og nú langar mig til að njóta þessarar upptöku í fullum hljómgæðum og helst eignast fleiri lög í svipuðum stíl með sömu flytjendum. Hvaða plötu(r) á ég að kaupa?

Svör frá lesendum (5) | Varanleg slóð

Kl. 19:01: Blogggreinin í Fréttablaðinu 

Fréttablaðið birti í dag grein um blogg (Fréttablaðið á PDF formi, bls. 24-25). Greinin er stutt og laggóð, og ég er ánægður með hvað þær málsgreinar sem vitna í mig koma vel til skila því sem ég sagði. Útkoman úr svona símaviðtölum er ekki alltaf jafn góð og þessi. Ég er bara kátur með blaðamanninn Þórarin (sem bloggar!), en þó finnst mér að hann hefði alveg mátt birta líka mynd af Bjarna mér til samlætis. :-)

Þórarinn nefnir til sögunnar vefinn "Blogcount.com" og segir að þar komi fram að á netinu séu tæplega 4000 íslenskar bloggsíður. Þó að Blogcount.com sé alveg prýðisgóður vefur með sérlega fróðlegar vísanir á greinar og rannsóknir um útbreiðslu bloggs vítt og breitt um heiminn, þá fann ég ekki neitt minnst á Ísland þar. Getur verið að Þórarinn hafi ætlað að vísa á Blogcensus.net og tungumálaupplýsingarnar þar?

Annars fannst mér pínulítið kyndugir þessir "fræga fólkið bloggar" rammar, þar sem Eva María Jónsdóttir, Sigurjón Kjartansson og Steinar Bragi skrifa tvö dagbókarbrot á kjaft. Hvar eru þessar vefdagbækur þeirra þriggja? Var þetta kannski svona "pappírsblogg" sem átti sér bara stað á blaðsíðum fréttablaðsins en ekki á netinu? Ef svo er þá legg ég til að við köllum það "tilgerðarblogg" eða "uppgerðarblogg" - enda ekki ósvipað því að fjölmiðill fjallaði um fólk sem étur bara grænmetisfæði (e. vegetarians) og fyllti upp í greinina með köflum um "fræga fólkið sem borðaði ekkert kjöt í tvo daga!!!" ;-) Er hægt að "blogga" í dagblaði?

Ekki það, það er alltaf gaman að lesa dagbókarbrot úr hversdagslífi fræga og fallega fólksins. Mér fannst bara pínu kyndugt að kalla þetta "blogg".

Hver er blogg-staðan á frægu bloggurunum þremur?

• Ef marka má leitarvélarnar er Eva María ekki með vefdagbók - nema hún bloggi í laumi undir dulnefninu "Ljósvakalæðupokinn" í stíl við stöllu sína úr Kastljósinu. :-)
• Sigurjón Kjartansson bloggar ...eða öllu heldur bloggaði, því síðasta færslan hans er dagsett 30. mars s.l. og þar áður skrifaði hann þann 29. janúar þessi orð: "Hvar hef ég verið? Ekki nennt? Bloggið er dautt!"
• Steinar Bragi virðist heldur ekki hafa bloggað neitt ef mark er takandi á leitarvélunum, og líkt og Eva María virðist hann ekki einu sinni nenna að halda úti heimasíðu (enda hafa þau bæði ábyggilega nóg annað við tímann að gera).

Þá vitum við það.

Svör frá lesendum (5) | Varanleg slóð