Færslur miðvikudaginn 20. ágúst 2003

Kl. 21:21: Lærdómur dagsins í dag 

1. Til er eitthvað sem heitir "Fundagerðabók" sem fæst í öllum ritfangaverslunum. Í hana á að handskrifa meginniðurstöður húsfunda og láta alla viðstadda á fundinum undirrita punktana á staðnum. Það er eina leiðin til að koma í veg fyrir að einhver fái bakþanka og harðneiti að hafa samþykkt eitthvað.
2. Til er eitthvað sem heitir Kærunefnd fjöleignarhúsamála. Hún starfar á vegum félagsmálaráðuneytisins og úrskurðar m.a. í álitamálum sem snúa að skilgreiningu eignarhluta og sameignar, og úrskurðir hennar hafa víst nokkuð þungt vægi fyrir rétti ef einhver málsaðila ákveður að kaupa sér lögfræðing og taka málið fyrir dómsstóla. Það kostar ekkert að leggja mál fyrir kærunefndina en úrskurður fæst sjaldnast fyrr en eftir 5-6 vikur.
3. Það getur borgað sig að hafa upp á fyrri eigendum og spjalla við þá. Það getur varpað nýju ljósi á álitamál. Maður þarf ekki að vera hræddur við fyrri eigendur.

...já, við erum að gera eignaskiptasamning í fyrsta skipti og það er smá sápuópera í gangi. Gaman, gaman!

Svör frá lesendum (1) | Varanleg slóð

Kl. 14:42: Pirringur er tímaeyðsla 

Ég þarf að hætta að eyða tíma og orku í að rífast við fólk sem fer í taugarnar á mér. Það er nóg af skemmtilegu og skynsömu fólki sem ég er ósammála og get "rifist" við. Ikke?

Gott rifrildi fær mann til að hugsa og fyllir mann af orku. Slæm rifrildi rífa bara niður og gera mann leiðan.

Svör frá lesendum (5) | Varanleg slóð

Kl. 12:29: Microsoft hugbúnaður og óöryggistilfinning 

• Sobig F
• MSBlast
• Welchi
• Blaster

Ég keyri Microsoft Windows 2000 á vinnuvélinni minni, og eftir ástand síðustu daga þá er ég orðinn stanslaust hræddur um að ég tapi fullt af vinnugögnum. Sú staðreynd að ég keyri Windows er farið að valda mér mjög mikilli óöryggistilfiningu.

Ég reyni að setja upp allar nýjustu öryggisuppfærslurnar frá Microsoft, en ég veit samt að það tryggir ekki öryggi tölvunnar minnar nema að litlu leyti. Ég nota ekki Internet Explorer nema til að prófa vefsíður sem ég skrifa sjálfur, og ég les tölvupóstinn minn aldrei í gegnum Outlook, og ég kveiki ekki á IIS nema einstaka sinnum og í stuttan tíma í senn. Samt er ég ekki fyllilega öruggur.

Þetta endalausa óöryggi pirrar mig. Næst þegar ég hef ekkert betra að gera þá ætla ég að setja upp Linux á tölvunni minni.

P.S. mér finnst það alveg ótrúlegt að bankar og ríkisstofnanir reiði sig algjörlega á Microsoft hugbúnað. Það vekur mér líka ugg.

Svör frá lesendum (8) | Varanleg slóð

Kl. 03:34: Andvaka 

Hlutir sem maður gerir þegar maður er andvaka um miðja nótt:

• Les fullt af skemmtilega skrifuðum færslum eftir Sour Bob?
• Telur vírusa og tilkynningar um vírusa jafnóðum og þær berast í pósthólfið manns? (kindur?)
• Leitar með hjálp Google að upplýsingum um hvort það megi virkilega ekki nota sápu á teflon pönnur eins og sumir halda fram? (Skv. Google virðist venjuleg uppþvottasápa í lagi.)
• Skrifar dagbókarfærslu? (Næturbókarfærslu?)

Fokkðiss, ég er lagstur aftur upp í til að sjá hvort ég sofni ekki aftur...

Svör frá lesendum (2) | Varanleg slóð