Teikningar af húsinu okkar

Skrifað 5. ágúst 2003, kl. 04:22

Ég hef undanfarið verið að mæla upp og teikna á tölvuna vandað uppkast af húsinu sem íbúðin okkar Stínu er í. Við erum að selja hana og til þess að það sé hægt þarf að ganga frá eignaskiptasamningi fyrir húsið, og slíkir samningar byggjast á samþykktum teikningum af viðkomandi húseign.

Þetta er búið að vera hálfgert eilífðarverkefni, en uppkastið mitt á loksins að vera tilbúið fyrir inntöku og formlegan frágang í AutoCad af einhverjum fagaðila sem kann til verka í svona teikningum. En af því mér finnst svona teiknivinna svo skemmtileg, þá ætla ég að vista þetta litla "afrek" mitt hérna í dagbókinni minni, þar sem það eru minni líkur á að skrárnar glatist en ef ég geymi þær bara á harða disknum heima.

Teikninguna má sækja bæði á Illustrator og PDF formi (PDF skjalið virkar ekki, ég mun laga það við fyrsta tækifæri). Hvor skrá um sig er innan við 300KB.

Væntanlegur kaupandi mun kannski hafa gaman að því að skoða teikningarnar að framtíðareigninni, og mér mun finnast gaman að eiga þessi skjöl til minningar um fyrstu eignina okkar Stínu - íbúðina þar sem Logi Garpur fæddist í stofunni.

P.S. Þessu tengt: DXF/DWG Export from Adobe Illustrator 8.

Meira þessu líkt: Húsnæði/heimili, Logi Garpur.