Már Örlygsson - Heimasíða og blogg - aðgengileiki í fyrirrúmi.

Keli og fjölnotenda SMS blogg

Skrifað 18. júlí 2003, kl. 01:24

Keli töffari er farinn að SMS blogga og segist búinn að útfæra grunn að fjölnotenda SMS-blogg kerfi sem hefur meira að segja sitt eigið símanúmer. (Þá þarf ekki lengur að notast við SMS-í-tölvupóst gáttir símfyrirtæjanna.)

Galdurinn felst í gömlum Nokia 5110 síma sem er tengdur við serial innstunguna á nettengdri tölvu. Síminn er með símanúmer sem hægt er að senda á SMS skeyti sem berast yfir serial kapalinn inn í tölvuna, og þar meðhöndlar forrit SMS skeytið og sendir það áfram sem dagbókarfærslu yfir á heimasíðu sendandans.

Keli skrifaði fyrstu útgáfuna af SMS forritinu sem ég er að nota. Ég tók forritið frá honum og bætti við það lykilorðsöryggi, vörpun yfir í séríslenska stafi, möguleika á að setja fyrirsögn á færslur, og leið til að steypa mörgum SMS saman í eina langa dagbókar færslu. Nú mun Keli væntanlega taka viðbæturnar mínar og bæta þeim við fjölnotendaforritið sitt. Eitthvað segir mér svo að endanlegi forritits kóðinn verði gefinn frjáls til þeirra sem vilja nota hann og bæta við hann enn frekar.

Smátt og smátt gætu þessar SMS tilraunir okkar litlu mannana orðið þó nokkuð spennandi.

Meira þessu líkt: Farsímablogg, Hugdettur.

Svör frá lesendum (6)

Gummi Jóh svarar:

Djöfull er þetta sniðugt. Segi ekki annað. Öfunda ykkur fyrir að nota þetta. Mblog og Bloggsíminn fölna finnst mér í samanburði við þetta, og svo er þetta svo stórskemmtilega nördalega útfært af ykkur. :)

18. júlí 2003 kl. 12:47 GMT | #
Már Örlygsson svarar:

Mér finnast bloggsímar og MMS blogg ekkert fölna í samanburðinum. Mér finnst það bara mjög flottar lausnir. Svo eru Hex líka með svona SMS blogg virkni eins og við Keli. Málið er bara að beta-test hópurinn þeirra hefur einbeitt sér meira að MMS myndabloggi og hljóðmyndunum - enda þykir flestum tæknifíklum svoleiðis dót miklu meira spennandi heldur en svona "lo-fi" SMS blogg.

Tilraunastarf Hex hefur veitt mér mikinn innblástur og ég vona bara að þetta nörderí okkar Kela geti veitt þeim einhvern smá innblástur á móti.

18. júlí 2003 kl. 13:11 GMT | #
halli svarar:

Reyndar sammála Gumma með þetta. Talblogg er hálf skrýtið eitthvað, það kemur illa út finnst mér og tóninn í fólki er svo gervilegur þegar maður heyrir það masa það sem það hefur að segja í síma og þetta hljómar svo lesið eitthvað.

MMS bloggið er meira svona fyrir hliðarblogg svipað og Einar gerir (www.eoe.is) gerir en ekki sem alvöru blogg því það kemst svo lítill texti með þessu og fleira.

Smsblogg er meira framlenging á hinu venjulega bloggi ef svo má segja heldur en enn einn fídusinn sem á að uppfæra gamla mátann ef maður getur útskýrt það þannig.

18. júlí 2003 kl. 14:04 GMT | #
Már Örlygsson svarar:

Já það er rétt. SMS blogg hefur aðra eiginleika en MMS myndskot og hljóðfærslur, og það má alveg til sanns vegar færa að eiginleikar SMS bloggs falli betur að hefðbundnum vefdagbókarskrifum en hitt - sérstaklega hljóðfærslurnar.

Það að MMS myndskotum fylgir sjaldnast neinn texti er aðallega vísbending um að viðkomandi MMS bloggari er latari við að skrifa en að smella af myndum. Sjálfur mundi ég gjarnan vilja geta látið myndir fylgja SMS færslunum mínum - og ég held að ég mundi ekki skrifa neitt styttri skilaboð þótt myndir fylgdu.

Líklega verður þessi löngun mín til þess að ég splæsi í nýjan síma með innbyggðri myndavél.

18. júlí 2003 kl. 14:14 GMT | #
Már Örlygsson svarar:

Í sambandi við hljóð"blogg" þá bendi ég á þessa færslu þar sem ég velti því fyrir mér, og fékk slatta af gáfulegum svörum frá lesendum: http://mar.anomy.net/entry/2003/07/08/01.02.52/

18. júlí 2003 kl. 14:28 GMT | #
Tómas H:: SMS Blogg

"Ólíkt talblogginu er ég mjög hrifinn af SMS blogginu, ég held að það sé eitthvað sem eigi eftir að virka. Ég væri mun tilbúnari til þess að senda inn skeyti bíðandi í biðröð einhverstaðar frekar en að fara að tala inn skilaboð og senda." Lesa meira

20. júlí 2003 kl. 20:17 GMT | #