Færslur fimmtudaginn 17. júlí 2003

Kl. 17:38: Reglulegar segðir eru vinir mínir 

Ég nota reglulegar segðir (e. regular expressions) til að búa til rétta íslenska stafi í SMS skeytunum mínum. Perl forritunarmálið er með sérstaklega góðan stuðning við reglulegar segðir, og það vill svo heppilega til að forritið sem meðhöndlar SMS skeytin mín er skrifað í Perl. :-)

Perldoc.com hefur sett skjölunina sem fylgir reglulegu segðunum í Perl upp á mjög snyrtilega og læsilega vefsíðu. Þessi síða hefur nýst mér vel í gegnum tíðina þegar ég hef þurft að rifja upp einhver mikilvæg smáatriði í sambandi við segðirnar.

Regulegar segðir eru dáldið tyrfnar fyrir byrjendur, en um leið og maður kemst í gang með að nota þær, þá opnast heill heimur af möguleikum í textameðhöndlun.

Perl.com er með ágætis kynningu á reglulegum segðum fyrir byrjendur. Líklega getur Google fundið fleiri slíkar síður fyrir þá sem hafa áhuga.

Fyrir þá sem eru ekki forritarar, þá eru regulegar segðir eiginlega sérstakt forritunarmál til að vinna með texta. Þær hjálpa manni að pilla út alls kyns orð og mynstur af táknum í textanum og framkvæma flóknar breytingar á honum.

Þannig útleggst t.d. reglulega segðin /^From.+(\d{7})\@sms\.tal\.is/ á mannamáli sem skipunin: "Leitaðu að línu í textaskjalinu sem byrjar á orðinu 'From' og leggðu á minnið símanúmerið í textanum (sjö tölustafi í röð) en á eftir því verður að koma táknarunan '@sms.tal.is'."

Sendu þitt svar | Varanleg slóð

Kl. 04:05: Fokk þreyttur 

Kominn heim úr Hvalfjarðargöngu dauðans (sjá undanfarin SMS skeyti). Stína er í sumarbústað, Garpur er kominn í mjúkt rúm og ég sit illa lyktandi og lerkaður fyrir framan tölvuna og skoða útkomuna úr SMS tilrauninni.

Næst á dagskrá: Ganga frá göngudótinu, fara í bað, drekka gott Islay viskí, fara að sofa og vakna á hádegi með hálsbólgu aldarinnar.

Svör frá lesendum (2) | Varanleg slóð

Kl. 02:57:  

Loksins komin í bílinn eftir mikla þrautagöngu kringum Hvalfell. Hvílík meðferð á litlum dreng! Logi er ekki í náðinni. :-) (sent með SMS)

Sendu þitt svar | Varanleg slóð

Kl. 01:27:  

...Garpur er loksins sofnaður á bakinu á Loga, sem var hvatamaðurinn að þessum glapræðisgöngutúr. Mætt eru: Vala, Steve, Óli, Hildur, Logi, Garpur og ég. (sent með SMS)

Sendu þitt svar | Varanleg slóð

Kl. 01:09:  

Sjáum núna loksins aftur niður í Hvalfjörð. Dauðþreytt! Ekkert símsamband & erfiðar skriður sunnan Hvalvatns. Púff! (sent með SMS)

Sendu þitt svar | Varanleg slóð

Kl. 01:00:  

Stöndum við Hvalvatn. Garpur er enn vakandi í bakpokanum en sofnar vonandi innan tíðar. Enn er langur vegur fyrir höndum. Flott birta (sent með SMS)

[Var skrifað um kl. 23:00 en sökum sambandsleysis tafðist skeytið.]

Sendu þitt svar | Varanleg slóð