[uppkast] HTML tilvísanir: <a href> og id hök

Skrifað 3. júlí 2003, kl. 22:58

Vísun annað (t.d. á aðra síðu): <a href="...">...</a>

<a> markið býr til vísun (e. "link") á ákveðið efni eða ákveðna vefsíðu. href="..." hlutinn er stilling (e. "attribute") sem tilgreinir hvert vísunin bendir. Einnig er mögulegt að bæta við title="..." stillingu sem tilgreinir nánari lýsingu á efninu sem vísað er á, t.d. fullan titil viðkomandi síðu.

Skoðum dæmi um texta með tveimur mismunandi vísunum:

<p>Skoðið <a href="http://www.mbl.is/">Mbl.is</a> og <a href="http://www.stjr.is/" title="Heimasíða Stjórnarráðs Íslands">Stjr.is</a>.</p>

Dæmið birtist svona í dæmigerðum vafra:

Skoðið Mbl.is og Stjr.is.

Seinni vísunin (stjr.is) inniheldur title texta sem birtist í flestum vöfrum þegar músarbendlinum er haldið yfir vísuninni í eina sekúndu eða svo.

Hak til að vísa beint á: id="..."

Það er hægt að setja id stillingu á öll HTML mörk, en það gerir það að verkum að hægt er að vísa beint á viðkomandi stað í textanum á síðunni. Kaflayfirlitið í upphafi þessarar greinar [sem sést ekki í þessu uppkasti] og vísar beint á staka kafla byggist einmitt á nokun id stillinga á kaflafyrirsögnunum. Dæmi um vísun og hak:

<p><a href="#prufuid">Prufuvísun</a></p>

<p id="prufuid">Svakalega merkileg efnisgrein sem ég vil vísa á sérstaklega...</p>


Dæmið birtist svona í dæmigerðum vafra.

Prufuvísun

Svakalega merkileg efnisgrein sem ég vil vísa á sérstaklega...

Eins og sjá má þá er vísað beint á viðkomandi <p> mark með því að setja viðkomandi id gildi (í þessu dæmi "prufuid") í vísunina og skeyta "#" tákninu framan við til að auðkenna að þarna sé vísað á id hak.

Þegar vísað er á hak frá öðrum síðum, þá setur maður #prufuid aftan á vefslóðina sem vísað er á. Dæmi: http://www.foobar.com/page.html#pageid

Ath: id gildi verða alltaf að byrja á bókstaf og mega að öðru leyti aðeins innihalda enska bókstafi, tölustafi og eftirfarandi tákn: punkt (.), bandstrik (-), undirlínu (_) og tvípunkt (:).

---

Meira þessu líkt: HTML/CSS.