[uppkast] HTML í hnotskurn

Skrifað 26. júní 2003, kl. 13:49

HTML (Hyper Text Markup Language) er einfaldur ritstíll til að marka vélritaðan texta þannig að hægt sé að sjá hvaða orð eru: fyrirsagnir, saman í efnisgrein, skipuleg upptalning, tilvitnun í e-ð sem aðrir hafa skrifað, vísun á aðrar síður, o.þ.h.

HTML byggist á því að setja HTML mörk (e. "tags") framan og aftan við orðin sem á að marka. Markið fyrir efnisgreinar er bókstafurinn "p" (fyrir "paragraph"). Þannig byrja allar efnisgreinar á <p> og lýkur með </p>. Oddklofarnir "<" og ">" standa utan um öll HTML mörk. Þegar skástrikið "/" birtist í markinu þá þýðir það að viðkomandi textamerkingu ljúki þar með.

Hér er dæmi um stutta málsgrein með nokkrum HTML mörkum:

<p>Það er <em>mjög gagnlegt</em> fyrir alla "bloggara" að kunna smá <a href="http://www.w3.org/">HTML</a> ef þau vilja nýta sér alla möguleika vefsins.</p>
<p>Þegar öllu er á botninn hvolft þá er HTML ósköp einfalt.</p>

Þarna sjáum við tvær efnisgreinar (<p>...</p>) þar sem lögð er áhersla á orðin "mjög gagnlegt" (<em>...</em>) og frá orðinu "HTML" er vísað á vefsíðuna www.w3.org (<a href="...">...</a>).

Textinn og HTML merkin birtast svona þegar allur kóðinn er skoðaður í dæmigerðum vafra:

Það er mjög gagnlegt fyrir alla "bloggara" að kunna smá HTML ef þau vilja nýta sér alla möguleika vefsins.

Þegar öllu er á botninn hvolft þá er HTML ósköp einfalt.

Í köflunum hér á eftir verða kynnt til sögunnar helstu HTML mörkin og notkun þeirra.

---

Meira þessu líkt: HTML/CSS.