![[Passamynd]](/files/2003/05/mar.gif)
Már ÖrlygssonÍslensk HTML íðorð sem ég nota
Vefbransinn er fullur af enskum orðum og flestir sem nota vefinn eru enn þann dag í dag að sletta þessum ensku orðum, eða vandræðast með kauðskar íslenskanir. Ég ákvað fyrir nokkru að prófa að temja mér að tjá mig um fagið mitt (sérstaklega það sem snýr að HTML forritun) á góðri íslensku, og til þess að slíkt virki þurfa orðin sem ég nota að vera þjál og auðskiljanleg fyrir utan fagsins og falla vel inn í hversdagslegar setningar.
Hér er listi yfir nokkur íslensk orð sem ég hef tamið mér að nota, og hafa reynst mjög vel m.v. ofangreindar forsendur.
- Link (hyperlink)
- Vísun, að vísa. (Rafrænar tilvísanir)
- Tag (HTML tags)
- Mark, HTML mörk, að marka. (Sbr. eyrnamerkingar á sauðafé)
- Style sheet
- Stíblað, stílsnið
- URL
- Vefslóð, URL (skammstöfun)
- Domain (domain name)
- Lén, lénsnafn
Tölvuorðanefnd vill að link sé "stikla", en algeng þýðing er "linkur", "tengill" eða "krækja". Tengill og krækja eru hvorki þjál í notkun, né almennilega lýsandi fyrir fyrirbærið. Þegar ég vísa á aðrar síður þá er ég hvorki að krækja í þær, né að tengja við þær eitt eða neitt, heldur er ég einfaldlega að vísa á þær. Ég hef um nokkurt skeið skrifað og talað um "vísanir" og "að vísa" án þess að neinn hafi kvartað eða hváð. Allir skilja hvað vísanir eru.
HTML mörk hafa gjarnan verið kölluð "tög" af íslenskum vefnördum, en mér hefur lengi fundist það vond þýðing og lítið lýsandi. Ég hef ekki eins langa reynslu af notkun "mark" hugtaksins og af orðinu "vísun", en ég hef samt nokkrum sinnum látið fólk sem ekki þekkir HTML fá það í texta og í öllum tilfellum skildi viðkomandi sjálfkrafa merkingu orðsins og hlutverk þessara "marka" í vefsíðugerð almennt.
"Vefslóð" og "lén" eru orð sem flestir eru sammála um að séu þjál og gagnleg og hafa náð nokkuð góðri fótfestu í málinu.
Meira þessu líkt: HTML/CSS, Lifandi tunga.
Svör frá lesendum (5)
Sigga Sif svarar:
Mer finnst tag einmitt svo snidugt ord. > segir vafranum af hvada tagi naesta "skipun" er!
26. júní 2003 kl. 09:33 GMT | #
Már Örlygsson svarar:
Ég fíla "tag" vel þegar það er notað í forritun en það er ekki alveg eins lýsandi þegar kemur að innihaldi HTML/XML skjala. Það að orðið sé lýsandi og auðskilið finnst mér skipta meira máli í HTML en hefðbundinni forritun, af því HTML snertir stærri hluta venjulegra tölvunotenda. Mamma og pabbi og Gunna frænka hafa öll gott af því að kunna smá skil á HTML mörkun.
Enska orðið "markup" varpast ágætlega yfir í "mörkun" og þaðan er stutt yfir í orðið "mark" fyrir "tag".
..en þetta er bara tilraun. :-)
26. júní 2003 kl. 09:44 GMT | #
palli svarar:
Ég er ekki viss um að ég gæti vanið mig af því að tala um HTML-tög enda held ég að það sé ekki skilyrði að orðin sem við notum yfir þessa hluti séu "góðar" þýðingar eða mjög lýsandi. [klisja on] Enda tölum við ekki um sjálfrennireið í dag. [klisja off] Samanber hugtakið link, ég hef notast við orðið hlekkur sem er nokkuð þjált jafnvel þótt það sé bein þýðing. Enda þegar ég hugsa um orðið 'link' þá hugsa ég mér einhvers konar pílu sem bendir á eitthvað annað en ekki járnhlekk í stórri keðju.
Þegar öllu er á botninn hvolft skiptir öllu (að því er mér finnst) að þýðingin sé þjál frekar en lýsandi.
26. júní 2003 kl. 09:59 GMT | #
Bergur svarar:
En hvað geriru þegar þú ert með flokkinn "Links" á heimasíðunni þinni.
Ég er sammála að ég nota orðið Vísun, Oftast þó þegar ég að "linka" yfir á aðrar heimasíður í færslunum mínum. Af því að þá er ég einfaldlega að vísa yfir á þær síður, útfrá því sem ég er að tala um. Samanber ef ég nefni þig á nafn, set ég vísun á þig.
Aftur á móti ef ég er með flokk á heimasíðunni minni sem inniheldur "linka" yfir á aðrar heimasíður, félaga, vefrit, hvað sem er að þá kalla ég þann flokk heimasíðunnar "Tenglar", finnst ekki eins og "Vísanir" virki nógu vel þá.
Þannig að undir flokkun Tenglar vísa ég á þig.
Krækja hefur mér aldrei fundist gott né lýsandi nafn.
30. júní 2003 kl. 22:08 GMT | #
Már Örlygsson svarar:
Bergur: Mér finnst titillinn "Vísanir" ágætur. Maður þarf bara að venjast honum. Aðrir möguleikar eru:
30. júní 2003 kl. 23:05 GMT | #