Færslur föstudaginn 13. júní 2003

Kl. 12:20: Á leið til Siglufjarðar 

Jæja, þá erum við Garpur á leið til Siglufjarðar, og verðum þar tveir saman fram í miðja næstu viku. Ég að vinna skilti og myndir fyrir Síldarminjasafnið og Garpur að kynnast Ölla afa og Guðnýju ömmu, og föðursystkynum sínum Hrafni og Hildi. Stína verður heima í borginni að taka á móti Mömmu sinni sem kemur til landsins á mánudag og æfa magadans og sinna sínum verkefnum.

Það er óvíst hvort ég muni skrifa mikið á vefinn þar til eftir að ég kem heim. Endilega haldið samt áfram að skrifa gáfulega hluti í svarþræðina við fyrri færslur.

Bless!

Sendu þitt svar | Varanleg slóð

Kl. 11:23: Besti HTML brandari í heimi 

...og mögulega sá eini sem er í leiðinni skammtafræði brandari:

Schroedinger's cat is <blink>not</blink> dead.

Heimild: Userfriendly teiknimyndin HTML Lesson #42: The only legitimate use of the greatly loathed <blink> tag.

Takk Logi fyrir ábendinguna.

Svör frá lesendum (2) | Varanleg slóð

Kl. 02:34: Nýyrðasmíð: Trackback = bakslóð eða bakvísun? 

Ég tek ofan fyrir góðri tillögu Tómasar að þýðingu á "Trackback". Tommi leggur til "bakslóð", sem mér finnst flott tillaga, en þó finnst mér eftir smá umhugsun bakvísun ívið þjálla og meira lýsandi en "bakslóð".

Þannig getur maður talað um bakvísanir og bakvísunarslóðir (e. Trackback URL) og bakvísanalista.

Ég vil samt hvetja fólk til að nota áfram orðið "Trackback" þegar verið er að tala sérstaklega um Trackback bakvísunarstaðalinn, vegna þess að í því samhengi er orðið "Trackback" sérnafn líkt og "HTML" og "Macintosh". Þannig er Trackback ein ákveðin aðferð til að búa til bakvísanir, en aðrar bakvísunaraðferðir eru m.a. Pingback, "Referer" listar, o.fl.

Svör frá lesendum (8) | Varanleg slóð

Kl. 02:13: Trackback eða referer listar 

Einar burritossnilligur bendir á greinina Take Your Trackbacks and Dangle þar sem John Gruber nöldrar yfir trackback og segir að referer bakvísanir séu miklu, miklu betri. Satt best að segja finnst mér þessi grein fremur léleg.

Hér eru helstu ástæðurnar fyrir því að ég er ósáttur við það sem John Gruber segir:

• Hann skrifar eins og trackback og "referer" bakvísanir geti ekki unnið saman á sömu síðunni. Trackback útilokar ekki aðrar bakvísunar- og svaraðferðir heldur vinnur samhliða þeim. Hver og ein aðferð hefur sína kosti og sína galla.

• Hann segir að trackback sé flókið en referer bakvísanir séu einfaldar sem er að vissu leyti rétt, en að mestu leyti kolrangt. Referer upplýsingar verða sjálfkrafa til í bókhaldi (e. log) vefþjónsins, en það er ekki þar með sagt sjálfgefið að birta þær á vefsíðunum. Langt því frá.

  Gruber tekur sér í lagi fram að hann hafi þurft aðstoð a.m.k. þriggja sérfróðra manna til að birta referer bakvísanir á síðunni sinni. Ennfremur sleppir hann alveg að minnast á að referer bakvísanir kalla á miklu fleiri og flóknari aðgerðir á vefþjóninum sem eru miklu þyngri í keyrslu en trackback kerfin.

  Öll umkvörtunarefnin sem hann tínir til í tengslum við tæknilegar útfærslur Trackback til foráttu gilda líka um referer bakvísanirnar sem hann mærir svo mikið.

• Hann bendir réttilega á að móttakandi trackback beiði þarf að hafa trackback-væddan hugbúnað sín megin, en það er rangt hjá honum að sendandi beiðninnar þurfi að keyra samskonar búnað. Handvirka trackback sendigræjan PingBuddy er skínandi dæmi um það.

• Að lokum finnst mér leiðinlegur nöldurtónn í greininni. Það er eins og Trackback fari af einhverjum ástæðum alveg óskaplega í taugarnar á grey manninum, sem er eiginlega bara fyndið því það er ekki eins og trackback sé eitthvað geðveikt merkilegt fyrirbæri. Trackback er bara ósköp einfaldur bakvísunar-samskiptastaðall. Ef John Gruber vill ekki nota trackback, þá getur hann bara sleppt því og þarf ekki að afsaka það fyrir einum eða neinum.

Að lokum tvær uppáhalds málsgreinar úr greininni:

"While Six Apart calls TrackBack a notification protocol, the way people really use it is as a connection protocol."

Í beinu framhaldi af þessari fullyrðingu, kemur hann með ítarlegri skýringu (áherslan mín):

"Person A sends a TrackBack ping to B to say that a post on A’s web site is related to a post on B’s web site."

Með öðrum orðum, þá telur hann að trackback sé ekki "tilkynninga"staðall heldur staðall til að "láta vita"... Huh? Hvað er að? :-)

P.S. Ég mundi að sjálfssögðu senda trackback bakvísun til Einars ef hann hefði svoleiðis hjá sér, en sem betur fer er hann með referer bakvísanakerfi, þannig að hann sér vonandi að ég var að skrifa um hann :-)

Svör frá lesendum (3) | Varanleg slóð