Góð ráð fyrir nýja Movable Type notendur

Skrifað 24. maí 2003, kl. 13:18

1. Ef þú hefur áður notað Blogger til að skrifa á vefinn, leyfðu þá Blogger vefslóðunum þínum að lifa áfram. Það hafa örugglega einhverjir vísað á gamlar færslur hjá þér og það er alltaf leiðinlegt að brjóta vísanir annara. Þrjár mismunandi leiðir eru færar í þessu sambandi:

   1. Láta Blogger færslusafnið (HTML skrárnar) lifa áfram óhreyft, og reyna ekkert að færa gömlu færslurnar inn í Movable Type (MT), heldur skrifa bara nýjar færslur í MT. Þetta er lang einfaldasta leiðin.
   2. Flytja gömlu færslurnar inn í MT og uppfæra alla tenglana þína á eldri færslur en leyfa gömlu Blogger skránum að standa áfram fyrir þá sem villast þangað inn. Frekar einfalt og virkar vel.
   3. Gera eins og í (b) en breyta Blogger archive síðunum þannig að vísanir inn á þær virki áfram en breyta textanum við hverja færslu þannig að hann vísi á nýju MT slóðina fyrir þá færslu. Frekar flókið í framkvæmd en mjög "snyrtileg" lausn.

2. Láttu dagsetninguna sjást í nýju dagbókarvefslóðunum þínum. MT býr sjálfgefið til vefslóðir með "ID" númeri hverrar dagbókarfærslu, en það getur valdið ótrúlegum vandræðum seinna meir þegar þú vilt flytja þessar færslur yfir í annað dagbókarkerfi (MT verður örugglega ekki seinasta kerfið sem þú munt nota! :-)

   Hér er kóði fyrir snyrtilegar vefslóðir, ekki ósvipaðar mínum, sem þarf bara að klístra inn í ""Weblog Config" -> "Archiving"" stillireitina í MT:

   • Individual Archives: <$MTEntryDate format="%Y/%m/%d/%H.%M.%S"$>.html
   • Daily Archives: <$MTArchiveDate format="%Y/%m/%d"$>/index.html
   • Monthly Archives: <$MTArchiveDate format="%Y/%m"$>/index.html
3. Uppfærðu RSS kóðann þinn upp í útgáfu 2.0. Hér er gefins RSS 2.0 sniðmátskóði til að klístra inn í staðinn fyrir kóðann sem kemur með MT. Svo er líka mjög góð hugmynd að breyta nafninu á RSS skránni þinni þannig að hún endi á .xml í stað .rdf.
4. Það er góð hugmynd að virkja valkostina "Turn on TrackBack auto-discovery" og "Allow Pings on by default" á MT stillisíðunni "Weblog Config" -> "Preferences".

Meira þessu líkt: Movable Type, Varanleiki & URL, Útgáfa.