Að svara hótun með barsmíðum?

Skrifað 20. maí 2003, kl. 23:40

Tómas og allir eru að vísa á frásögn 19 ára pilts af því að þjóðþekktur maður hafi hótað honum barsmíðum eftir að drengurinn notaði bílflautuna á hann. Ljótt ef satt er, en það sem mér finnst sorglegast er að sjá hversu margir þeirra sem svara færslunni tala um að viðkomandi hefði átt að svara hótun mannsins með því að ganga í skrokk á honum með félaga sínum.

Mér finnst þessi hugsunarháttur meðal ungra manna vera mun alvarlegri en þessi meinta hótun sem sagt er frá, hugsunarhátturinn að karlmennskan felist í því að svara móðgun með líkamlegu ofbeldi.

Ég hef séð (oftar en einu sinni) mann laminn og sparkaðan í spað af drengjahópi í Austurstræti. Það var ekkert hetjulegt eða karlmannlegt við þann gjörning. Um síðustu jól, í Toronto, sá ég miðaldra pylsusala slá til ungs manns sem var dónalegur, og ungi maðurinn og félagar hans kýldu og spörkuðu pylsusalann í gangstéttina. Pylsusalinn "slapp" illa fótbrotinn, vegna þess að ég og fleiri vitni gerðum okkur líkleg til að skakka leikinn og ungu mennirnir forðuðu sér. (Heimskulegt af mér þar sem ég var með Garp á bakinu, en samt.) Þessi ofbeldistjáskipti voru ljótleikinn uppmálaður og mér leið illa í sálinni í marga daga á eftir.

Það sýnir svo ótrúlega andlega- og félagslega fátækt þegar fólk þarf að beita ofbeldi (helst með hópbarsmíðum) til að verja einhvern ímyndaðan "heiður", og ég held að svona ofbeldisdýrkun grasseri all-illilega meðal ungra íslenskra manna og drengja.

P.S. Ekki að það skipti neinu máli, en Live2Cruize.com er einhverskonar félag bílaáhugamanna. Gaman að skoða vefsíður hjá bílanördum. :-)

Meira þessu líkt: Karlmennska, Sögur og minningar.