Færslur miðvikudaginn 14. maí 2003

Kl. 20:07: Kjánakastljós 

Kristján í Kastljósinu er að ræða við Guðmund Odd, Katrínu femínistaformann, og einhvern auglýsingastofumann., um "klámvæðingu" í auglýsingum og markaðssetningu almennt. Ágæt umræða. Sérstaklega fannst mér "plebba" komment Godds um "dirty weekend" herferð Flugleiða alveg frábært. Goddur er oft alveg ótrúlega beittur. Mér finnst auglýsingastofugúbbinn ekki mjög sannfærandi.

En Kristján klikkaði í heimildavinnunni sinni. Fyrsta dæmið sem hann sýndi um "klám" í auglýsingum var mynd sem hann "fann á netinu" sem var kynnt sem auglýsing fyrir Puma íþróttavörur og sýnir eitthvað sem virðist vera ung stúlka að totta strák. Ef Kristján hefði eytt smá tíma í að kynna sér staðreyndir málsins, t.d. með smá gagnrýnni leit með Google hefði hann vitað að þarna er á ferðinni mjög skemmtileg, fræg fölsun sem hefur ekkert með Puma að gera.

Líka athyglivert að Katrín gerði enga athugasemd við dæmið hans Kristjáns, í ljósi þess að þessi feik auglýsing var rædd á femínistapóstlistanum um daginn og þá benti glöggur listameðlimur öllum á að þarna væri um fölsun að ræða.

Seinna dæmið, Sisley.com, er hins vegar mjög ekta og alveg sjúkt dæmi um klámvædda markaðsherferð sem er öll miðuð á börn og unglinga. Sisley er með verslun í Smáralind. Ég ætla aldrei að stíga fæti inn í þá búð.

Svör frá lesendum (8) | Varanleg slóð

Kl. 11:09: Kortagerð litla mannsins 

Keli übernörd er að fikta í kortagerð með GPS og SVG. Mjög töff dæmi sem gæti auðveldlega undið mikið upp á sig.

Annars er það synd hvernig Landmælingar Íslands liggja á sínum kortagögnum eins og ormur á gulli. Kortagögn þeirra eru til fyrir tilstilli skattpeninganna okkar allra og mér finnst það hrein sóun að almenningur hafi ekki a.m.k. lágmarks ókeypis aðgang að þeim til nýsköpunar, gagns og gamans.

Landmælingar ættu að gefa út á netinu öll sín mælinga- og kortagögn á hráu formi, og leyfa ókeypis notkun, afritun og dreifingu með vissum skilmálum. Þannig gæti áhugafólk þróað spenndi hugbúnað og smáþjónustur sem nýta gögnin og heilmikil nýsköpun gæti átt sér stað. Það mætti svo hugsanlega heimta fullt afnotagjald af þeim sem hyggðust nota gögin í beinu gróðaskyni.

Svör frá lesendum (4) | Varanleg slóð