Færslur Þriðjudaginn 6. maí 2003

Kl. 23:57: Að feminískum leiðarlokum 

Fyrr í dag skráði ég mig af femínistapóstlistanum. Taugarnar þurftu smá hvíld :-). Ég er ekki alveg viss, en mig grunar að þar með sé ég jafnframt genginn úr femínistafélaginu. (Hvernig virkar meðlimaaðild að félaginu annars?)

Þrátt fyrir að yfirlýst stefna félagsins sé að vera sameiningarvettvangur fyrir sem flestar gerðir femínisma og breiðfylking femínista með ólíkar skoðanir, þá er reyndin sú að á póstlistanum þrífst engin umræða í friði nema hún samræmist mjög skýrt afmarkaðri sýn á femínisma. Hugmyndin um að allir femínistarnir í skóginum geti talað/starfað saman í vinsemd og af virðingu hljómar mjög vel, en virðist því miður ekki ganga upp í reynd.

Ég lít samt ekki svo á að þáttaka mín á listanum hafi verið tímasóun - þvert á móti hefur hún verið mjög fróðleg og ég hef lært mjög mikið á umræðum síðustu vikna:

• Ég er búinn að kynnast betur femínistanum í sjálfum mér.
• Ég er með færri fordóma í garð femínista.
• Ég veit betur hverju ég er sammála og hverju ósammála.
• Ég hef fræðst um fjölmörg merkileg málefni og séð sjónarhorn mismunandi fólks á þau.
• Ég hef lært betur að tjá mig af virðingu um flókin, tilfinningaþrungin málefni.
• Ég hef kynnst (beint og óbeint) merkilegum konum og körlum sem ég ber núna mikla virðingu fyrir.

Þetta er búið að vera ómetanlegt.

P.S. ég er áfram femínisti.

Svör frá lesendum (5) | Varanleg slóð

Kl. 23:09: Gælunöfn sem Garpur hefur fengið 

Litlir drengir á fyrsta ári eiga það til að vera kallaðir ýmsum gælunöfnum:

1. Stúfur
2. Litli humar (nýfæddur, organdi og rauður frá hvirfli til ilja)
3. Stubbur
4. Stubbastrákur
5. Logi kúkur (út um allt, upp á bak, niðr'í sokka)
6. Bjartur
7. Litli engill
8. Litli álfur (með húfu)
9. Ljúfur
10. Knúsikall
11. Brosmildur
12. Fallegur
13. Litli frekjuhundur
14. Rassálfur (án bleyju)
15. Knúsilíus
16. Elsku strákur

Þetta eru nöfnin sem hann hefur fengið frá mér. Mamma hans skrifar örugglega annan álíka lista í dagbókina sína.

Svör frá lesendum (2) | Varanleg slóð