Hugmynd: SMS blogg

Skrifað 27. apríl 2003, kl. 12:29

Flestar vefdagbækur er hægt að uppfæra með innsláttarforritum eins og BlogBuddy. Þetta gildir sér í lagi um dagbækur sem er viðhaldið hjá Blogger.com, með Movable Type og fleiri kerfum. BlogBuddy og slíkir ritlar notfæra sér forritunarviðmót sem öll þessi bloggkerfi eiga sameiginlegt, svokallað Blogger API. Þetta sama forritunarviðmót má nýta til að breyta SMS skeytum í bloggfærslur.

Þjónustuaðilinn þarf að hafa eftirfarandi:

1. Tölvu tengda við GSM síma sem getur tekið við SMS skeytum og unnið með innihald þeirra.
2. Forrit sem les og skrifar í gagnagrunn eftirfarandi upplýsingar um hvern notanda: símanúmer, blogg-notendanafn, blogg-lylkilorð, blogg-ID, og XML-RPC vefslóð bloggsíðunnar.
3. Forrit sem móttekur SMS textaskeyti frá skráðum símanúmerum og notar upplýsingarnar úr gagnagrunninum til að senda blogg-færslur með XML-RPC skipun (blogger.newPost)
4. 1 stk. vefsíðu með einföldum notkunarleiðbeiningum

Skráningar- og notkunarferlið liti svona út fyrir notendum:

1. Notandi fer inn á vefsíðu SMS-blogg þjónustunnar og les leiðbeiningarnar.

2. Hann sendir eitt eða tvö skráningar-SMS til þjónustunnar með: a) blogg-notandanafninu sínu, b) blogg-lykilorðinu, c) blogg-ID auðkenni og d) vefslóð til að senda XML-RPC köllin á.

   Dæmi: Reg:: u:jonbr pw:gulur123 id:3562146 url:plant.blogger.com/api/RPC2

   Ef allar upplýsingarnar rúmast ekki í einu SMS skeyti þá bíður þjónustan þar til restin berst í öðru SMS frá sama símanúmeri.

3. Notandinn bíður í nokkrar mínútur eftir að færsla sem segir "Þú ert núna skráður í SMS-blogg" birtist á bloggsíðunni hans til marks um það að skráningin hafi heppnast.
4. Öll skeyti sem notandinn sendir á SMS-blogg þjónustuna þaðan í frá birtast sjálfkrafa á bloggsíðunni hans, svo fremi að skeytin byrji ekki á "Reg::" því slík skeyti eru meðhöndluð sem um breytingu á upplýsingum um notandann sé að ræða (skref 2 og 3 endurtekin).

ATH: ég geri ekki ráð fyrir að SMS-blogg þjónustan þurfi að senda nein SMS skeyti sjálf, heldur getur allt "feedback" frá henni til notandans gegnum bloggsíðuna hans. Þetta getur haldið kostnaðinum við þjónustuna í algjöru lágmarki, en að sjálfssögðu er ekkert því til fyrirstöðu að þjónustan sendi svar skeyti beint í síma notandans.

Nokkrar viðbótarhugmyndir:

Hér að framan útlista ég hvernig svona þjónusta getur fúnkerað í sinni einföldustu mynd, en það má auðveldlega sjá fyrir sér ýmsa viðbótar virkni sem gaman væri að þjónustan gæti boðið upp á. Dæmi um slíkar viðbætur eru:

• Þjónustan bíði í nokkrar mínútur með að senda bloggfærsluna og ef fleiri SMS berast frá sama símanúmeri innan þess tíma þá eru bæði SMSin send sem ein löng færsla. Að öðrum kosti má segja að ef SMS skeyti enda á þremur punktum (...) þá merki það að framhald sé á leiðinni og SMS-blogg þjónustan bíður með að senda þar til það berst.
• Bjóða notendum að senda SMS skeyti á mismunandi blogg síður úr sama GSM símanum. Þá byrja notendur á að skilgreina "default" bloggið sitt með því að senda skeyti eins og tilgreint er í skrefi 2, en bæta svo við öðrum bloggum með því að senda Reg:: ... skeyti með stuttu textauðkenni fyrir viðkomandi blogg fremst í skeytinu. Dæmi: Reg::djamm:: u:jonbr[o.s.frv.]. Þegar notandinn vill skrifa á djamm-síðuna sína þá bætir hann orðinu djamm:: fremst í þau SMS skeyti.
• Taka við MMS skeytum með ljósmyndum og vista myndirnar á vefþjóni og sýna þær sem hluta af bloggfærslunni.

Post Scriptum

Þessar hugmyndir fæddust í skemmtilegu spjalli sem við Finnur Magnússon áttum á föstudaginn. Ég birti þessar hugmyndir hér í þeirri von að einhver hafi áhuga á að skrifa svona þjónustu svo ég geti notfært mér hana. :-)

---

Meira þessu líkt: Farsímablogg, Hugdettur, Útgáfa.