Færslur laugardaginn 26. apríl 2003

Kl. 14:49: American Psycho? 

Leiðindavefsvæðið rantur.com er horfið af vefnum og Tómas H skrifar stuttlega um það.

Í skáldsögunni (og síðar bíómyndinni) American Psycho er sögð saga ungs verðbréfabraskara. Hann er vel menntaður, í vel launuðu starfi hjá virðulegu fyrirtæki, og af góðum ættum. Á yfirborðinu er allt slétt og fellt og fallegt en í skjóli myrkurs fremur hann skelfileg ofbeldisverk. Hann virðist fullur haturs í garð lágstéttarfólks og kvenna og hefur ríka pyntingarhvöt. Inn á milli i bókinni, milli persónulegra lýsinga á óyndisverkum mannsins, brestur hann á með angurværum umfjöllunum um uppáhalds tónlistarmennina sína eða úttektum á bestu ástalögum Whitney Houston.

Ég get ekki að því gert að sjá ákveðna tengingu milli þess sem gekk á í skjóli nafnleysis á Rantur.com, og "atmósunnar" í American Psycho. Lágstéttahatrið, kvenhatrið, siðblindan í níðinu, og svo einhverjar svona "schizo" greinar inn á milli um hvað það er yndislega gaman að leika sér á róló með litlum börnum.

Auðvitað er ég ekki að eigna þessum mönnum neitt annað en það sem þeir skrifuðu opinberlega á Rantur.com. Hins vegar finnst mér vert að draga fram hliðstæðurnar milli skáldsögunnar og persónanna sem þeir sýndu á netinu, og velta fyrir mér hverjar fyrirmyndir þeirra séu og hvaða hvatir drífa þá áfram.

Önnur pæling: Það alkunna í vissum hópi fólks hvaða menn það voru sem stóðu að skrifunum á Rantur.com, en ég velti fyrir mér: Mundi það þjóna einhverjum tilgangi að nafngreina þessa einstaklinga opinberlega? Í aðra röndina sé ég ekki hvað væri rangt við það en á sama tíma finnst mér það vera algjör óþarfi.

Svör frá lesendum (5) | Varanleg slóð