![[Passamynd]](/files/2003/05/mar.gif)
Már ÖrlygssonTíkarfemínismi
Ágúst snilli pælir mikið í kynjajafnrétti þessa dagana. Hann vísar m.a. á greinar eftir erki-Tíkina Helgu Baldvinsdóttur Bjargardóttur.
Ég er hrifinn af því sem Helga segir í greininni Æ, þetta helv... jafnréttiskjaftæði. Hins vegar gengur Helga með tvo "hatta" til skiptis. Femínistahatt annars vegar og sjálfsstæðisflokkshatt hins vegar og mér finnst þeir stangast svolítið á þegar ég les hinar greinarnar sem Ágúst vísar á.
Það er eins og Helga hafi farið úr Bríetarrétttrúnaði yfir í rétt-fyrir-kosningar-flokkshollustu. :-) Mig grunar alla vega að Helga átti sig alveg á mikilvægi sýnilegra fordæma hvað varðar "möguleika" og "sókn" kvenna í hvers kyns valdastöður í samfélaginu.
Dæmi úr heimi karla: Það dugir skammt að segja "ykkur er frjálst að hætta að vinna og sjá um heimilið", því á meðan fyrirmyndirnar vantar þá þorir enginn karlmaður að stíga skrefið vegna a) ótta við viðbrögð annara karla (vina/kunningja/framtíðar vinnuveitenda) og b) viðbragða kvenna sem treysta þeim ekki og tala niður til þeirra.
Það sem ég á við er að sýnilegur fjöldi kvenna í pólitík hefur sterkt fordæmisgildi (enn þann dag í dag a.m.k.) og segir þannig víst eitthvað um möguleika þeirra sama hvað öll löggjöf um jafnrétti kynjanna segir. Ég er ekki fylgandi "jákvæðri mismunun" en ég er fylgjandi aktívum áróðri og háværum kröfum um jafna stöðu kynjanna - bæði karla og kvenna.
Meira þessu líkt: Femínismi.
Svör frá lesendum (4)
Ágúst svarar:
Mér finnst allt í lagi að fyrirgefa henni flokkshollustuna fyrir kosningar, þar sem hugsunin hvað varðar femínismann virðist vera alveg heil. Ekki það að ég er fullkomlega sammála henni í gagnrýninni á 40/60 regluna sem Samfó miðar við og það að Samfylkingin skuli stunda virka, "jákvæða" mismunun. Var það ekki í kosningu til miðstjórnar flokksins sem tveimur körlum var ýtt út fyrir tvær konur, til að passa upp á hlutföllin? Er það jafnrétti kynjanna?
Svo finnst mér málflutningur hennar ekkert verra þótt hún leyfi sér að kjósa Davíð. Mér finnst hann heldur ekkert betri fyrir vikið.
17. apríl 2003 kl. 20:13 GMT | #
Már Örlygsson svarar:
Góðir punktar Ágúst. Þó finnst mér það vera pólitískt einkamál Samfylkingarinnar hvernig þau velja á framboðslistana sína eða í miðstjórnina sína. Mér finnst að það megi líta á svona kynjahrókeringar sem tilraunir - og þar fær Samfó plús í kladdann hjá mér fyrir að sýna það í verki sem þau reyna að boða.
Ég tel að þrátt fyrir almenna andstöðu mína við "jákvæða mismunun", þá sé samt í vissum tilfellum réttlætanlegt að jafna stöðuna aðeins með handvirkum aðferðum - en bara sem algjörlega tímabundna aðgerð, til að koma á "hlutlausri" stöðu í kerfinu, þar sem jafnræði karla og kvenna er áþreifanlega jafnt. Ef síðan konur heltast úr lestinni af "náttúrulegum" ástæðum þá verður það bara að vera gott og vel.
Við getum hins vegar aldrei fullyrt að lágt hlutfall kvenna í valdastöðum þjóðfélagsins sé til komið af einhverju eðlislægu áhugaleysi hjá konum fyrr en við höfum prófað tölfræðilega "jafnt" ástand í smá tíma. Þú skilur, ég er á móti óþarfa valdbeitingum, en samt sé ég alveg hvernig það getur stundum þurft smá "push" til að koma kaldri og stirðri bílvél í gang.
Ég er líka svo eigingjarn að ég held að aukin þáttaka kvenna í valdastöðum þjóðfélagsins muni óbeint valda því að jafnréttisstaða karlmanna batni líka þar sem á okkur er hallað. Þetta helst allt í hendur. :-)
17. apríl 2003 kl. 21:17 GMT | #
Bragi svarar:
Er hugmyndinum jákvæða mismunun ekki örlítið bjöguð í þessari umræðu? Hvernig skiljum við þetta hugtak? Það tengist strax við kynjakvóta og slíkar aðgerðir. Mér finnst þessi útlistun vera bjögun á hugmyndinni sem á að lagfæra samkeppnisaðstöðu karla og kvenna. Hún byggist á hugmyndinni um að nota vald sem tæki til jöfnunar. Ég held að þetta sé meira umhugsunarefni en svo að hægt sé að móta sér ákveðna skoðun útfrá einstökum dæmum eða kringumstæðum. Við stundum jákvæða mismunun í svo mörgu og það er okkur nánast eðlislægt að gera slíkt. Við getum ekki haft gaman að leikjum án þess að skapa ákveðna forgjöf einfaldlega til að njóta spennu og keppni. Auðvitað er eitthvað á bak við hugmyndina og auðvitað erum við með því að beita henni að gera á rétt einhvers. En málið er bara það að til þess að gera ekki á rétt neins þyrftum við að vera skuggar okkar sjálfra. Með þessarri hugmynd værum við að gera á rétt þeirra sem meira mega sín og upphefja og styrkja stöðu kvenna sem hafa verið okaðar í lengri tíma.
18. apríl 2003 kl. 01:47 GMT | #
Björn svarar:
Er það ekki barnalegt að ráða konu í starf bara vegna tegundar kynfæris hennar? Ég er sammála að jafna þarf stöðu kynjanna - bæta þarf hlut karla í löggjöfinni!
18. apríl 2003 kl. 11:15 GMT | #