Hvernig getur vefrit náð aukinni athygli

Skrifað 8. október 2002, kl. 01:21

Ég var í dag spurður hvernig lítil vefsvæði eða vefrit geta notað til að auglýsa sig og stækka lesendahóp sinn án þess að kosta til þess miklum peningum. Eftirfarandi ábendingar koma allar að gagni:

1) Áhugavert efni og grípandi stíll

Besta leiðin til að ná vinsældum er að gefa út áhugavert efni sem fólk sækist í að lesa/skoða. Þetta er örugg leið en kostar mikinn tíma og mikla vinnu.

Stundum getur einnig ritstíll og efnisleg nálgun vefrits komið í veg fyrir að annars gott efni nái þeirri athygli sem það "á skilið". Þetta gildir ósjaldan um pólitísk vefrit, hjá þeim vill oft brenna við að efnið sé stílað inn á þröngan, en dyggan, lesendahóp sem er þá þegar handgenginn þeim pólitísku skoðunum sem vefritið boðar. (Messað yfir organistanum, ef svo má að orði komast.)

Þannig geta pólitísk vefrit oft stækkað lesendahóp sinn með því einu að haga ritstíl, orðavali og rökstuðningi á hátt sem er betur til þess fallinn að ná athygli stærri lesendahóps með fjölbreyttari skoðanabakgrunn.

2) RSS fyrirsagnir og póstlistar

Með því að gefa lesendum kost á að skrá sig á tilkynningapóstlista má ná til hóps lesenda sem hefur áhuga en hefur ekki nennu/tíma til að heimsækja vefsvæðið daglega til að athuga með nýtt efni.

Útgáfa yfirlita/fyrirsagnalista á stöðluðu XML (RSS!) formi þjónar sama/svipuðum tilgangi en nær til aðeins annars hóps - þ.e. þeirra sem nota RSS lesara (sbr. http://rss.molar.is) til að fylgjast með uppáhalds vefsvæðunum sínum.

3) Auglýsingar og útgáfa gegnum <iframe>

Auglýsingar virka vel til að vekja athygli á vefsvæðum.

Í fyrsta lagi má notast við hefðbundna auglýsingareiti og greiða fyrir afnotin af þeim, eða "plata" velvildarmenn vefritsins til að birta auglýsingar af hreinni hugsjón.

Í öðru lagi má "leyfa" fólki að setja lítinn <iframe> ramma á heimasíðurnar sínar með einhverju áhugaverðu/skemmtilegu innihaldi sem uppfærist reglulega. T.d. má veita ýmsa þjónustu beint í gegnum svona <iframe> reiti.

Dæmi um <iframe> útgefendur eru fyrirsagnaþjónustuvefirnir RSS.molar.is og Nagportal.net, en fjölmargir vefleiðarahöfundar ("bloggarar") birta efni frá þeim á síðunum sínum, en í báðum tilfellum auglýsa viðkomandi vefir sig og þjónustu sína neðanmáls á síðunum sem birtast í reitnum.

Aðrir möguleikar væru að framkvæma dreifðar skoðanakannanir í <iframe>, safna áheitum, hafa samkeppnir, etc. og jafnvel umbuna þeim á einhvern hátt sem hjálpa við að dreifa útgáfunni.

4) "Referer" tenglar

Með því að vísa til baka á þá sem vísa á efni/greinar á vefritinu fá lesendur vissa hvatningu til að vísa á athygliverðar greinar því á móti fá þeir einhverjar heimsóknir frá lesendum vefritsins.

Þetta má gera með því að telja fjölda heimsókna á einstakar síður og fylgjast með "referer" upplýsingunum í aðsóknarskránni (þær segja til um hvaðan gestirnir koma) og birta lista af vísunum á "referer" síðurnar.

Þetta er eitthvað sem ritstjórnin getur gert handvirkt, en þó er oftast betra að skrifa forrit sem gerir þetta jafnóðum og sjálfkrafa. (Til að minnka líkur á misnotkun má svo sleppa því að margtelja heimsóknir sem koma með stuttu millibili frá sömu IP-tölu, sama vafra og sama stýrikerfi, o.s.frv.)

5) Svarþræðir aftan í greinum

Með "svarþráðum" er átt við kerfi sem gefa lesendum kost á að skrifa skoðun sína á stökum greinum og vísa á frekari umfjallanir á öðrum vefsvæðum. Slík kerfi henta vel til að auka samfélagsvitund lesenda viðkomandi vefrits. Ennfremur glæða slíkir samræðuþræðir vefritið auknu lífi og geta þannig, í vissum tilfellum, náð athygli stærri hóps en ella.

Vandamálið hins vegar við svona svarkerfi er "hávaðinn" sem fylgir Spam-svörum og og hættan á því að leiðinleg rifrildi brjótist út, en slíkt getur svert ímynd jafnvel hinna bestu vefsvæða. Ef þessi leið er valin, þá þarf að fylgjast vandlega með því sem fólk skrifar og ritskoða grimmt "tröllakúkinn" um leið og hann birtist.

(Ritstjórnarstefna slíkra svarþráða þarf að koma skýrt fram á vefsvæðinu.)

6) Linkar á aðrar/skyldar greinar

Það má fjölga þeim síðum sem hver lesandi sækir, með því að birta á hverri greinasíðu lista yfir skyldar greinar eða eldra efni sem tengist á einn eða annan hátt efni viðkomandi síðu. Með slíkri "endurnýtingu" á eldra efni sparar ritstjórnin krafta sína, efni vefsritsins myndar skýrari fjölvíða heild, auk þess sem lesendur vefsins eru líklegri til að finna efni sem vekur áhuga þeirra.

7) Auðvelt og öruggt að "linka"

Ein endingarbesta leiðin til að fá athygli og fleiri heimsóknir er að fá fólk til að vísa á vefinn - helst ekki bara á forsíðuna heldur á stakar greinar. Forskilyrði þess að fólk vísi á efni af heimaíðum sínum er að það sé auðvelt og líklegt til að endast.

Því er mikilvægt að vefslóðir undirsíðna séu sýnilegar og ekki "faldar" inn í HTML ramma ("frameset"). Reyndin er sú að fæstir netnotendur kunna að "veiða" vefslóð síðu innan úr rammaumgjörð, og því eru beinar og markvissar vísanir sjaldgæfari á vefsvæðum sem nota ramma.

Þá er einnig jafn mikilvægt að vefslóðir allra undirsíðna séu einfaldar og varanlegar. Varanlegar þannig að þær þurfi ekki að breytast þótt vefurinn sé fluttur til nýs hýsingaraðila eða skipt sé um forritunarumhverfi í bakendanum.

Þegar vefslóðir breytast, þá "brotna" allar vísanir frá öðrum vefsvæðum og viðkomandi síða/síður "hverfa" samstundis úr öllum leitarvélum (a.m.k. um stundarsakir). Heilmikil uppsöfnuð verðmæti tapast við slíkar breytingar.

8) Sýnileiki í leitarvélum

Að lokum má minna á mikilvægi þess að gera leitarvélum auðvelt fyrir.

Forsíður og aðrar (yfirlits)síður sem breytast oft, þurfa að innihalda einfaldar, almennar innihaldslýsingar í <meta>  tögum. Notkun slíkra upplýsingataga minnkar m.a. líkurnar á því að leitarvélarnar sendi fólk á síður sem hafa breyst síðan leitarvélin heimsótti vefsvæðið síðast.

Aftur á móti er rétt að forðast slíkar almennar innihaldslýsingar á undirsíðum, síðum með stökum greinum, og öðrum síðum sem breytast sjaldan eða ekki. Á þeim er annað hvort rétt að sleppa alveg innihaldslýsingunni og leyfa innihaldi síðunnar að tala sínu máli - ellegar að sníða lýsinguna vandlega að efni síðunnar.

Ennfremur má benda á að "óhreinar" vefslóðir eru illa séðar af sumum leitarvélum (slóðir teljast "óhreinar" ef þær innihalda t.d. ?, = og & tákn).

Lokaorð

Ég vona að þessi stutta samantekt nýtist einhverjum vefeigendum. Ennfremur spyr ég: Dettur ykkur lesendum í hug einhver fleiri ráð fyrir útgefendur lítilla vefsvæða til að ná heimsyfirráðum á vefnum?

---

Meira þessu líkt: Varanleiki & URL, Útgáfa.