Færslur mánudaginn 26. ágúst 2002

Kl. 18:36: Hvers konar fólk? 

Það fer ekki hjá því
þegar maður hefur eignast lítið barn,
að maður velti því fyrir sér
hvað fær fólk til að finna upp
trúarbrögð sem kenna hugmyndir á borð við
"erfðasyndina".

Það hlýtur að þurfa að vera
dáldið skringilega innrætt
til að detta í hug
að tengja nýfædd börn við syndsemi
og óheilagleika,

því þeir sem raunverulega
þekkja til lítilla barna vita að
þar kemst hugmyndin um hreinleika og syndleysi
næst því að sleppa
út í skítugan efnisheiminn.

Engir nema kynsveltir og ógiftir
kaþólskir kennimeistarar
gætu ímyndað sér svona nokkuð
um lítil börn.

Það er mín kenning

eftir rúmlega sex vikna
sleitulausar rannsóknir
á eigin syni...

Svör frá lesendum (2) | Varanleg slóð

Kl. 18:32: Skrýtið (af barni) 

Hann hefur ekki gert neitt merkilegt.
Það eina sem hann hefur gert
er að vekja mig ítrekað á nóttunni,
ropa og prupma eins og versti sjómaður,
æla yfir mig allan,
og míga á mig þegar síst skyldi.

Hann segir ekki orð, og gerir ekkert merkilegt.
Hann í mesta lagi grætur og orgar.
En samt þykir mér alveg vænna um hann
en nokkuð annað í lífinu.

Þessi litli terroristi hefur tekið
líf mitt í gíslingu.
Með sínar litlu hlýju hendur,
sem fálma stjórnlausar í hálsakotinu mínu
og stóru augun sem horfa svo hugfangin
á hversdagslegar ljósakrónur og hurðarkarma
eins og slíkir undragripir hafi aldrei áður
sést.

Þeir kalla það "Stokkhólmsheilkennið",
þegar sem fórnarlömbin tengjast kúgurum sínum
sterkum tilfinningaböndum.

Kannski eru þessar tilfinningar þannig - hver veit?
En eitt veit ég, og það er að
mér þykir alveg óskaplega vænt
um þennan litla dreng.

- - - - -

Í dag fór Logi Garpur í 6 vikna skoðun á Heilsuverndarstöðinni. Hann reyndist jafn heilbrigður og daginn sem hann fæddist. Mældist: 5,5 kg, 58 cm að lengd og höfuðummál 40 cm.

Svör frá lesendum (1) | Varanleg slóð