Hrafn Gunnlaugson í Júróvisjón?

Skrifað 14. maí 2000, kl. 18:58

Júróvisjón var í gær. Ég og Stína fórum í mjög skemmtilegt partí til hennar Guðbjargar í Garðabæ. (Takk Guðbjörg!)

Þarna var samankominn hinn skemmtilegasti hópur af fólki. Jósi, Stebbi, Högni, Gyða, Gríma, Guðbjörg, Kristjana, Jenný, Kristjana Þórey, Kári sæti, Magga, Kiddý (undir lokin), Þráinn, Helgi, Anna Heiður, og úff ég er ábyggilega að gleyma einhverjum. Gleðin stóð frá sjö til ca. miðnættis, en þá leystist hópurinn upp í almennt bæjarskrölt.

Það vakti annars athygli manna hversu kunnuglegt andlit söngvara sænska lagsins var. Sumir vildu halda því fram að þarna væri á ferðinni enginn annar en íslandsvinurinn Hrafn Gunnlaugsson í dulargerfi.

Ef svo, þá af hverju?

Getur verið að Svíarnir hafi loksins ákveðið að kalla til Hrafn, sem hefur selt sál sína Sænsku kvikmyndaakademíunni í a.m.k. 20 ár, til þess að vinna skítverkin fyrir þá; stíga á svið og syngja í Júróvisjón!?

Þetta er ekki einleikið!