Færslur mánudaginn 21. júní 1999

Kl. 03:00: Risa rusl að hætti Oldenburgs 

Claes Oldenburg var ferlega flottur kall. Yndislega klikkaður. Ég var aðskoða bók um hann um daginn og varð voða hrifinn.

Einn morguninn var ég svo að labba í í vinnuna og var að pæla í öllu ruslinu og ógeðinu út um allt í borginni. Þá uppgötvaði ég skyndilega hinu brýnu þörf fyrir svona risastórt rusl. Tveggja metra sígarettustubbar á miðri gangstéttinni. Mega tyggjóklessur uppi á túninu fyrir framan stjórnarráðið. Risastórum flöskubrotum og beigluðum áldósum hér og þar.

Ég vona bara að einhver ríkur og góður maður bjóðist til að hjálpa mér við að búa til risa listarusl.

Sendu þitt svar | Varanleg slóð

Kl. 02:00: Gangstéttarhellulist 

Skítugar og tyggjóklesstar gangstéttarhellur geta verið mjög flottar. Náttúruleg málverk - klessuverk.

Það væri gaman að ganga um bæinn og skipta út flott skítugum hellum fyrir nýjar og hreinar og selja þær gömlu sem innrömmuð myndverk á vegg eða sem lausstandandi skúlptúra eða litlar stein borðplötur. Hver hella bæri svo heiti þeirrar götu og húsnúmers þaðan sem hún var tekin.

Hellurnar sem eru settar í staðinn og eru hreinar mætti svo e.t.v. merkja og segja frá hversvegna skipt var um hellu.

Ennfremur mætti merkja ákveðnar (nýjar) hellur greinilega sem sérstök tyggjó- og skítsvæði og láta svo fólki eftir að skíta út hellurnar og fjarlægja þær svo að ákveðnum tíma liðnum.

Sendu þitt svar | Varanleg slóð

Kl. 01:00: Borðskanni sem ljósmyndatæki 

Jón Óskar gerði hundrað portrett þar sem hann lét fólk reyna að vera eins kyrrt og það gat á meðan skanninn rann sinn gang.

Hvar lá snilldin í verkinu hjá Jóni Óskari? Tæknin var augljós og hafði verið notuð á nákvæmlega sama hátt í óteljandi skipti á undan portrettunum hundrað. Hinsvegar hafði enginn prentað útkomuna út og gert úr formlega myndlistarsýningu áður. - Lá snilldin þar?

Mér finnst Jón Óskar ekki hafa reynt að nýta eiginleika borðskannans. Borðskanninn ljósmyndar nefnilega flöt sem liggur í gegnum bæði tíma og rúm.

Einn endi myndarinnar sýnir ávallt ástand sem var mun fyrr en það ástand sem hinn endi myndarinnar sýnir. Hlutir breyta um form og stærð eftir því hvernig þeir hreyfast. Ástand hlutanna tekur breytingum á meðan. Flöktandi lýsing í umhverfinu getur haft áhrif.

Mig langar til að vinna með borðskannann sem ljósmyndatæki.

Sendu þitt svar | Varanleg slóð