Að kalla útí tómið

Skrifað 22. maí 1999, kl. 01:00

Það getur verið mjög hreinsandi að tala við sjálfan sig, og skrifa niður það sem hrærist í hausnum á manni. Vefurinn gefur þessari therapíu alveg nýja vídd. Hann er fullkominn og skilvirkur útgáfumiðill sem nær jafnt til allra án þess þó að vera uppáþrengjandi. Það að hugsa upphátt á vefsíðu sameinar alla kosti þess að hugsa í einrúmi, öskra ein uppi á heiði, tala við besta vin sinn og að hlaupa allsber yfir Laugardalsvöllinn á landsleik. Ég veit að ég á eftir að nýta mér þennan sérstæða eiginleika markvisst í framtíðinni og mig skal ekki undra ef menn muni almennt átta sig á og viðurkenna þennan eiginleika vefsins.